Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 97 Hüküm no: 76 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Çelebi b. Mehmed Bey’in evini Fâtıma Hatun bt. Abdülmennan’a sattığı Mahmiye-i Galata muzâfâtından kasaba-i Beşiktaş mahallâtından Cihânnümâ mahallesi sâkinlerinden Murad Çelebi b. el-merhûm Mehmed Bey nâm kimesne mahfil-i şer‘-i kavîm-i vâcibü’t-tekrîmde işbu râfi‘atü’l-kitâb fahrü’l-muhadderât Fâtıma Hatun bt. Abdülmennan tarafından husûs-ı âti’z-zikri tasdîka nehc-i şer‘ üzere vekîl olan oğlu fahrü’l-akrân İbrahim Çelebi b. Hasan nâm kimesne muvâcehesinde bi-tav‘ihî ikrâr-ı tâm ve takrîr-i kelâm edüp mahalle-i merkūmede vâki‘ bir tarafı Solak Mustafa Çelebi b. Keyvan mülkü ve bir tarafı merhûm Hasan Paşa bahçesi ve bir tarafı vâlidem Halime Hatun mülkü ve bir tarafı tarîk-i âm ile mahdûd ve mümtâz fevkānî bir bâb kâşî odayı ve bir bâb kahve odası ve bir köşkü ve tahta-pûşu ve kenîfi ve tahtânî bir bâb mahzen ve bir bâb ahırı ve harâbe bir bâb odunluk? ve zâtü’l-eşcâr-ı müsmire ve gayr-i müsmireyi müştemil mülk menzilimi cümle tevâbi‘ ve levâhıkı ile mezbûre Fâtıma Hatun’a elli yedi bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i meşrûh üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr elli yedi bin akçeyi yedinden bi’t-tamâm ve’l-kemâl ahz [23b] u kabz eyledim ba‘de’l-yevm sâlifü’z-zikr menzil mersûme Fâtıma Hatun’un mülk-i müşterâsı ve hakk-ı sırfıdır keyfe mâ teşâ ve tehtâr sâir emlâki tasarrufu gibi mutasarrıfe olsun dedikde mukırr-ı mezbûr Murad Çelebi’nin cârî ve sâdır olan ikrârını vekîl-i merkūm İbrahim Çelebi bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâlis ve’l-ışrîn min-Saferi’l-hayr li-sene isneteyn ve sittîn ve elf. Şühûdü’l-hâl: Mustafa Çelebi b. Süleyman Bey, Mustafa Çelebi b. Keyvan el-Yesârî, Nasûh Çelebi b. Musa, Ahmed Ağa b. Mehmed, Ahmed Beşe b. Şaban, Mehmed Beşe b. Receb ve gayruhüm mine’l-hâzırîn.