Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 98 Hüküm no: 77 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakomin v. İstemad’ın, Halil Çelebi ve Mehmed Çelebi’ye babalarından miras kalan köleleri Nikola v. Corci’ye kefil olması Mahmiye-i Galata’da vâki‘ Dörtyolağzı’nda sâkin Yakomin v. İstemad nâm zimmî meclis-i şer‘-i hatîr-i lâzımü’t-tevkīrde mahmiye-i mezbûreye tâbi‘ kasaba-i Beşiktaş mahallâtından Sinan Paşa-yı Cedîd mahallesinde sâkin iken bundan akdem vefât eden Ali Kethüdâ’nın sulbî sagīr oğulları Mehmed Çelebi’nin ve Halil Çelebi’nin vasiyy-i şer‘îleri olan vâlideleri Belkıs Hatun bt. Abdülmennan tarafından husûs-ı âti’l-beyânı kabûl ve tasdîka nehc-i şer‘ üzere vekîl olan hâmilü hâze’l-kitâb [Sinan] Reis b. Mehmed nâm kimesne muvâcehesinde bi-tav‘ihî ikrâr ve takrîr-i kelâm edüp müteveffâ mezbûr Ali Kethüdâ’nın esîrlerinden olup irs-i şer‘le oğulları mezbûrân Mehmed Çelebi’ye ve Halil Çelebi’ye intikāl edüp işbu hâzır bi’l-meclis uzun boylu koyun elâ gözlü açık kaşlı ve altı yüz kıt‘a riyâl guruş bahâsı olan Giridiyyü’l-asl Nikola v. Corci nâm esîr mâdâmki âl-i Osmân halledallâhu hilâfetehû hazretlerinin taht-ı hükûmetlerinde olan vilâyetlerden bilâ-hadîd yürüyüp ve eğer bilâd-ı İslâm’da dahi bazı hisâr altlarından varılırsa yine bilâ-hadîd yürümek şartı ile evvelen nefsine ve sâniyen firâr edüp gaybet-i münkatı‘a ile gaybet eylerse kıymeti olan sâlifü’z-zikr altı yüz kıt‘a riyâl guruşu kendi malımdan edâya ta‘ahhüd ve emr-i kabûlü hâvî kefâlet-i sahîha-i şer‘iyye ile kefîl oldum dedikde vekîl-i mezbûr Sinan Reis dahi kefâlet-i mezbûru kabûl ve vech-i meşrûh üzere olan kelâmını tasdîk etmeğin mâ-vaka‘a bi’t-taleb ketb olunup yed-i tâlibe def‘ olundu. Tahrîren fî yevmi’s-sâlis ve’l-ışrîn min-Saferi’l-hayr li-sene isneteyn ve sittîn ve elf. Şühûdü’l-hâl: Ali Efendi el-Müderris, Enver Efendi b. Salih, Mustafa Çelebi b. Şaban Ağa, Zülfikār Beşe b. Abdullah, Halil Çelebi b. Mehmed el-Müezzin ve gayruhüm hâzırîn.