Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 98 Hüküm no: 78 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halime Hatun bt. Abdülmennan’ın vefat eden kocası Mehmed Bey’de olan mehir ve verâset bedelini teslim aldığı Mahmiye-i Galata’ya tâbi‘ kasaba-i Beşiktaş mahallâtından Cihânnümâ mahallesinde sâkin iken bundan akdem vefât eden Mehmed Bey’in verâseti zevce-i metrûkesi Halime Hatun bt. Abdülmennan ve kebîr oğlu Murad Çelebi’ye münhasıra olduğu şer‘an zâhir ve mütebeyyin oldukdan sonra merkūme Halime Hatun tarafından husûs-ı âti’l-beyânı ikrâra nehc-i şer‘ üzere vekîl olan Ahmed Ağa b. Mehmed nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb mezbûr Murad Çelebi [24a] muvâcehesinde bi’l-vekâle ikrâr ve takrîr-i kelâm edüp müvekkilem mezbûre Halime Hatun’un müteveffâ-yı mersûm Mehmed Ağa’nın zimmetinde mütekarrer olan beynlerinde mikdârı ma‘lûm mehr-i müeccelini ve kendisine âid olan hisse-i şâyi‘asını müteveffâ-yı mersûmun muhallefâtından bi’t-tamâm ahz u kabz eyleyüp merkūm Murad Çelebi’nin zimmetini muhallefât-ı mezkûra müte‘allik da‘vâdan ibrâ-i âmm-ı kātı‘ü’n-nizâ‘ ile ibrâ ve ıskāt eyleyüp min-ba‘d husûs-ı mezbûra müte‘allik merkūm Murad Çelebi ile da‘vâ ve nizâ‘ı yokdur dedikde vekîl-i mersûm Ahmed Ağa’nın vech-i muharrer üzere cârî ve sâdır olan kelâmı merkūm Murad Çelebi talebiyle ketb olundu. Tahrîren fi’l-yevmi’s-sâlis ve’l-ışrîn min-Saferi’l-hayr sene isneteyn ve sittîn ve elf. Şühûdü’l-hâl: Mustafa Çelebi b. Keyvan el-Yesârî, Hüseyin Bey b. Perviz, Mustafa Halîfe b. Yakub, Mustafa Çelebi b. Şaban, Halil Çelebi b. Hüseyin ve gayruhüm mine’l-hâzırîn. Nasûh Beşe b. Musa, Muslu Bey, Mustafa Beşe el-Bostânî, Mustafa Bey b. Süleyman Bey, Receb b. mezbûr, Mehmed Çelebi b. Hasan, Murad Çelebi b. ( ) Tellâl, Mustafa Beşe b. Mehmed, Mehmed b. Ramazan Muhzır.