Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 99 Hüküm no: 79 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Çelebi’nin vefat eden babası Mehmed Bey’in muhallefatındaki hissesini teslim aldığı Mahmiye-i Galata’ya tâbi‘ kasaba-i Beşiktaş mahallâtından Cihânnümâ mahallesi sâkinlerinden iken bundan akdem vefât eden Mehmed Bey’in verâseti zevce-i metrûkesi Halime Hatun bt. Abdülmennan’a ve kebîr oğlu Murad Çelebi’ye münhasıra olduğu şer‘an zâhir ve mütebeyyin oldukdan sonra mezbûr Murad Çelebi mahfil-i kazâda işbu sâhibetü’l-kitâb mersûme Halime Hatun tarafından husûs-ı âti’l-beyânı tasdîka nehc-i şer‘î üzere vekîl olan Ahmed Ağa b. Mehmed nâm kimesne muvâcehesinde bi-tav‘ihî ikrâr ve takrîr-i kelâm edüp müteveffâ-yı merkūm babam Mehmed Bey’in muhallefâtından kendi hisse-i şer‘iyyemi muhallefât-ı mersûmeden bi’t-tamâm ve’l-kemâl ahz u kabz eyleyüp ve vâlidem mezbûre Halime Hatun’un zimmetini husûs-ı mezbûra müte‘allik da‘vâdan ibrâ-i âmm-ı kātı‘ü’n-nizâ‘ ile ibrâ ve ıskāt eyledim min-ba‘d muhallefât-ı merkūma müte‘allik vâlidem mersûme Halime Hatun ile da‘vâ ve nizâ‘ım yokdur dedikde mukırr-ı mezbûr Murad Çelebi’nin vech-i muharrer üzere cârî ve sâdır olan kelâmı vekîl-i mezbûr Ahmed Ağa talebiyle ketb olundu. Tahrîren fi’l-yevmi’s-sâlis ve’l-ışrîn min-Saferi’l-hayr li-sene isneteyn ve sittîn ve elf. Şühûdü’l-hâl: Şuhûdü’s-sâbıkūn.