Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 100 Hüküm no: 80 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Keyvan el-Yesârî’nin evini Murad Çelebi b. Mehmed Bey’e sattığı Mahmiye-i Galata’ya tâbi‘ kasaba-i Beşiktaş mahallâtından Cihânnümâ mahallesi sâkinlerinden Mustafa Çelebi b. Keyvan el-Yesârî mahfil-i kazâda işbu râfi‘ü’l-kitâb Murad Çelebi b. el-merhûm Mehmed Bey muvâcehesinde ikrâr ve takrîr-i kelâm edüp mahalle-i mezbûrede vâki‘ bir tarafı Emetullah Hatun mülkü ve bir tarafı Süleyman Bey mülkü ve bir tarafı Külhânî Ali mülkü ve bir tarafı tarîk-i âm ile mahdûd ve mümtâz iki bâb fevkānî odayı ve tahta-pûş ve bir bâb mahzen ve bir bi’r-i mâyı ve kenîfi ve zât-ı eşcâr-ı müsmire ve gayr-i müsmireyi müştemil mülk menzilimi cümle tevâbi‘ ve levâhıkı ile merkūm Murad Çelebi’ye üç yüz altmış beş kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm [ve] kabz eyledikden sonra semeni olan meblağ-ı mârrü’z-zikr üç yüz altmış beş aded riyâlî guruşu yedinden bi’t-tamâm ve’l-kemâl ahz u kabz eyledim ba‘de’l-yevm sâlifü’z-zikr menzil mersûm Murad Çelebi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Saferi’l-hayr li-sene isneteyn ve sittîn ve elf. Şühûdü’l-hâl: Mustafa Çelebi b. Şaban, Hüseyin Bey b. Perviz, Halil Çelebi b. Hüseyin, Ahmed Ağa b. Mehmed, Nasûh Çelebi b. Musa, Murad Çelebi Tellâl, Mehmed Çelebi b. Hasan, Mustafa Bey b. Süleyman, Mustafa Çelebi b. Yakub, Mustafa Muhzır ve gayruhüm.