Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 100 Hüküm no: 81 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safer b. Mehmed kendisini darp eden Hasan Çavuş b. Abdullah ile sulh yoluyla anlaştığı Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinlerinden Safer b. Mehmed nâm kimesne meclis-i şer‘-i hatîr-i lâzımü’t-tevkīrde medîne-i Üsküdar kazâsına tâbi‘ Heybeli nâm karye sükkânından işbu sâhibü’l-kitâb Hasan Çavuş b. Abdullah nâm kimesne muvâcehesinde bi-tav‘ihî ikrâr ve takrîr-i kelâm edüp târih-i kitâbdan üç gün mukaddem karye-i mezbûrede balık bey‘ eder iken merkūm Hasan Çavuş bilâ-sebeb deynek ile başıma ve alnıma urup beni mecrûh eyleyüp da‘vâ ve taleb eylediğimde mezbûr Hasan Çavuş inkâr ben dahi isbât sadedinde iken beynimize muslihûn ve Müslimûn tavassut edüp “es-sulhu seyyidü’l-ahkâm” fehvâsınca cerhim mukābelesinde bin altı yüz akçe üzerine sulh inşâ eylediklerinde ben dahi sulh-ı mezbûru kabûl ve bedel-i sulh olan meblağ-ı mezkûr bin altı yüz akçeyi mezbûr Hasan Çavuş yedinden ahz u kabz eyleyüp zimmetini husûs-ı mersûme müte‘allik da‘vâdan ibrâ-i âmm-ı kātı‘ü’n-nizâ‘ ile ibrâ ve ıskāt eyledim ba‘de’l-yevm mazmûn-ı kitâba muhâlif benden veya vekîlimden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâdis [25a] ve’l-ışrîn min-Saferi’l-hayr li-sene isneteyn ve sittîn ve elf. Şühûdü’l-hâl: Mustafa Çelebi b. Şaban, Nasûh Çelebi b. Musa, Ali Çavuş el-Mübâşir, Halil Çelebi b. Mustafa, Mehmed Beşe b. Abdullah, Salih Çelebi, Mehmed Beşe b. Musa, Ahmed Beşe b. Mehmed, Mehmed Beşe b. Mustafa, Mehmed Çelebi b. Mehmed, Abdi Beşe b. Ali, Muslu Beşe b. Receb