Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 101 Hüküm no: 83 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Çelebi b. Mehmed Bey’in Çerkez asıllı cariyesi Üftâde bt. Abdullah’ı azad ettiği Mahmiye-i Galata’ya tâbi‘ kasaba-i Beşiktaş’da Cihânnümâ mahallesi sâkinlerinden Murad Çelebi b. Mehmed Bey nâm kimesne mahfil-i şer‘-i kavîm-i vâcibü’t-tekrîmde kendüye rıkkı i‘tirâf eyleyen işbu orta boylu açık kaşlı gök elâ gözlü ve sağ gözü yanında alâka-i cerhi olup Çerkeziyyetü’l-asl bâ‘isetü hâze’l-kitâb Üftâde bt. Abdullah nâm câriyesi muvâcehesinde ikrâr ve takrîr-i kelâm edüp evsâf-ı mezkûr ile mevsûfe olan câriyem Üftâde’yi hasbeten lillâhi te‘âlâ i‘tâk ve tahrîr ve mülkümden ihrâc ve silk-i harâir-i asliyyîne idrâc eyledim ba‘de’l-yevm mezbûre Üftâde sâir harâir-i asliyyât gibi hürre olup üzerinde hakk-ı velâdan gayrı hakkım kalmadı dedikde mukırr-ı merkūm Murad Çelebi’nin vech-i meşrûh üzere cârî ve sâdır olan ikrârını mezbûre Üftâde talebiyle ketb olunup yedine def‘ olundu. Tahrîren fi’l-yevmi’s-sâlis ve’l-ışrîn min-Saferi’l-hayr li-sene isneteyn ve sittîn ve elf. Şühûdü’l-hâl: Mustafa Çelebi b. Keyvan el-Yesârî, Ahmed Ağa b. Mehmed, Mehmed Beşe b. Abdullah, Mustafa Beşe b. Mehmed, Cafer Beşe b. el-mezbûr ve gayruhüm mine’l-hâzırîn.