Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 105 Hüküm no: 91 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Ahmed’in vârislerinin ölmeden önce Hristodori v. İlya’ya sattığı ev bedelinden kalan parayı teslim aldıkları Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karyede sâkin iken bundan akdem vefât eden Mehmed Çelebi b. Ahmed nâm kimesnenin verâseti zevce-i metrûkesi Bâdıyeldân bt. Abdülmennan nâm hatuna ve sulbiye kebîre kızı Fâtıma’ya ve sulbî sagīr oğulları Ahmed ve Mustafa’ya münhasıra olduğu mütehakkık oldukdan sonra mezbûre Bâdıyeldân Hatun kendi tarafından asâleten ve sagīrân-ı merkūmânın kıbel-i şer‘den mansûbe vasîleri olmağın vesâyeten <> ve merkūme Fâtıma dahi asâleten mahfil-i kazâda işbu râfi‘ü’s-sifr Hristodori v. İlya nâm zimmî muvâcehesinde herbiri ikrâr ve takrîr-i kelâm edüp mûrisimiz müteveffâ-yı mezbûr Mehmed Çelebi hâl-i hayâtında târih-i kitâbdan dört sene mukaddem silk-i mülkünde münselik olup karye-i mezbûrede vâki‘ bir tarafı Mehmed Ağa mülkü ve bir tarafı Âişe Hatun mülkü ve bir tarafı sâhil-i bahr ve bir tarafı tarîk-i âm ile mahdûd fevkānî dört bâb beyti ve bir mahzeni ve tahta-pûşu ve kayıkhâneyi ve kartiye? ta‘bîr olunur dolabı ve balıkağı seddini ve kenîfi müştemil mülk menzili cümle tevâbi‘ ve levâhıkı ile merkūm Hristodori’ye bin kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semen-i mezkûr bin kıt‘a riyâlî guruşdan sekiz yüz seksen beş guruşunu müteveffâ-yı mezbûr Mehmed Çelebi târih-i mersûmda ahz u kabz edüp bâkī yüz on beş guruşu mezbûr Hristodari zimmetinde kalmış idi hâlâ verâsetimiz hasebiyle meblağ-ı bâkī yüz on beş guruşu dahi mezbûr Hristodori yedinden bi-tamâmihî ahz u kabz eyleyüp menzil-i mezkûr merkūm Hristodori’nin mülk-i müşterâsıdır keyfe mâ yeşâ ve yehtâr mutasarrıf olsun dediklerinde mukırretân-ı mezbûretânın cârî ve sâdır olan ikrârlarını el-mukarru lehü’l-merkūm Hristodori bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâdis min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Seyyid Abdülbâkī Çelebi b. Ahmed, İsmail Beşe b. Hasan, Mustafa Efendi el-İmâm, Musa Halîfe el-Müezzin, Mehmed Beşe b. Şaban, Mehmed Bey b. Abdullah, Hasan Ağa b. Abdülmennan, Süleyman Beşe b. Abdullah, Mehmed Ağa b. Abdülvehhâb, Seyyid Ali b. Abdülhâlik, Dilâver Beşe [b.] Abdullah, Zülfikār b. Mehmed, Mustafa Beşe b. Mehmed, Nasûh Çelebi b. Musa, Cafer b. Mehmed Muhzır ve gayruhüm.