Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 106 Hüküm no: 92 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hristodori v. İlya’nın evini Mehmed Ağa b. Muslu’ya sattığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sâkinlerinden Hristodori v. İlya nâm zimmî meclis-i şer‘-i hatîr-i lâzımü’t-tevkīrde işbu sâhibü’l-kitâb Mehmed Ağa b. Muslu nâm kimesne tarafından husûs-ı âti’z-zikri tasdîka vekîl olup hasm-ı şer‘î-i câhid mahzarında İsmail Beşe b. [27b] Hasan ve Musa Halîfe b. Mehmed nâm kimesneler şehâdetleri ile şer‘an vekâleti sâbite olan Hasan Ağa b. Abdülmennan nâm kimesne muvâcehesinde bi-tav‘ihî ikrâr ve takrîr-i kelâm edüp karye-i mezbûrede vâki‘ bir tarafı Mehmed Ağa mülkü ve bir tarafı Âişe Hatun mülkü ve bir tarafı sâhil-i bahr ve bir tarafı tarîk-i âm ile mahdûd fevkānî dört bâb beyti ve bir mahzeni ve tahta-pûşu ve kayıkhâneyi ve kenîfi müştemil mülk menzilimi merkūm Mehmed Ağa’ya bin kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr bin kıt‘a guruşu yedinden bi’t-tamâm ve’l-kemâl ahz u kabz eyledim ba‘de’l-yevm sâlifü’z-zikr menzil mezbûr Mehmed Ağa’nın mülk-i müşterâsı ve hakk-ı sırfıdır keyfe mâ yeşâ ve yehtâr sâir emlâki tasarrufu gibi mutasarrıf olsun dedikde mukırr-ı mezbûr Hristodori’nin cârî ve sâdır olan ikrârını vekîl-i merkūm Hasan Ağa bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-âşir min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Şuhûdü’s-sâbıkūn.