Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 107 Hüküm no: 93 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Muslu’nun evini Osman Efendi Vakfı adına mütevellisi Ömer Bey b. Süleyman’a istiğlâl yoluyla sattığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karye sâkinlerinden Mehmed Ağa b. Muslu nâm kimesne tarafından husûs-ı âti’z-zikri ikrâra vekîl olup hasm-ı şer‘î-i câhid mahzarında Musa Halîfe b. Mehmed ve Mehmed Beşe b. Abdullah nâm kimesneler şehâdetleri ile şer‘an vekâleti sâbite olan Hasan Ağa b. Abdülmennan nâm kimesne meclis-i şer‘-i hatîr-i lâzımü’t-tevkīrde karye-i mezbûrede vâki‘ Osman Efendi Vakfı’nın nukūduna bi’l-fi‘il mütevellî olan Ömer Bey b. Süleyman nâm kimesne muvâcehesinde bi’l-vekâle ikrâr ve takrîr-i kelâm edüp müvekkilim merkūm Mehmed Ağa’nın silk-i mülkünde münselik olup karye-i mezbûrede vâki‘ bir tarafı Mehmed Ağa mülkü ve bir tarafı Âişe Hatun mülkü ve bir tarafı sâhil-i bahr ve bir tarafı tarîk-i âm ile mahdûd mülk menzilini cümle tevâbi‘ ve levâhıkı ile mütevellî-i merkūm Ömer Bey’e üç yüz elli kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi mâl-ı vakf-ı mezbûr ile bi-tarîki’l-istiğlâl iştirâ ve tesellüm ve kabz eyledikden sonra yine menzil-i mezbûru gıbbe’t-tahliyeti’ş-şer‘iyye târih-i kitâbdan bir sene tamâmına değin dört bin iki yüz akçeye müvekkilim mûmâ-ileyh Mehmed Ağa’ya îcâr ve teslîm ol dahi vech-i muharrer üzere istîcâr ve kabûl ve kabz eyledi dedikde gıbbe’t-tasdîki’ş-şer‘î menzil-i mezbûrun derkine ve ücret-i lâzımesine vekîl-i merkūm Hasan Ağa emr-i kabûlü hâviye kefâlet-i sahîha-i şer‘iyye ile kefîlim dedikde mâ-vaka‘a bi’t-taleb ketb olundu. Tahrîren fi’l-yevmi’l-hâmis aşer min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Şuhûdü’s-sâbıkūn, es-sâbıkūn. Beyaz sahh.