Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 107 Hüküm no: 94 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Hürrem’in kocası Murad Çelebi b. Mehmed’de mehir bedelinden kalan parayı kocasına hibe ettiği Mahmiye-i Galata’ya tâbi‘ kasaba-i Beşiktaş mahallâtından Cihânnümâ mahallesi sâkinelerinden Râbia bt. Hürrem nâm Hatun meclis-i şer‘-i hatîr-i lâzımü’t-tevkīrde zevci işbu sâhibü’l-kitâb Murad Çelebi b. Mehmed nâm kimesne muvâcehesinde bi-tav‘ihâ ikrâr ve takrîr-i kelâm edüp hibetü’d-deyn mimmen aleyhi’d-deyn câizetün bi-kabûli’l-mevhûbun-leh meselesi mehfûmunca zevcim mezbûr Murad Çelebi zimmetinde mütekarrer olan altı bin akçe mehr-i müeccel hakkımdan üç bin akçesin merkūm Murad Çelebi’ye hibe-i sahîha-i şer‘iyye ile hibe ve temlîk ol dahi meclis-i hibede ittihâb ve temellük eyledi. Ba‘de’l-yevm meblağ-ı mezkûr üç bin akçe mersûm Murad Çelebi’nin mülk-i mevhûbudur ancak zimmetinde üç bin akçe mehr-i müeccel hakkım kalmışdır ve mukābele-i hibeden mezbûr Murad Çelebi dahi bir turuncu zenne kadife kaftân bana def‘ ve teslîm ben dahi ahz u kabz eyledim dedikde mukırre-i mezbûre Râbia Hatun’un vech-i muharrer üzere cârî ve sâdır olan ikrârını merkūm Murad Çelebi vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâmis min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Mustafa Çelebi b. Keyvan el-Yesârî, Mustafa Çelebi b. Şaban, Hüseyin Çelebi b. Perviz, Halil Beşe b. Hüseyin, Mustafa Çelebi b. Yakub, Ahmed Ağa b. Mehmed, el-Hâc Mustafa b. Hüseyin, Mustafa Beşe el-Bostânî, Receb Çelebi b. Süleyman, Mehmed Çelebi Takyeci.