Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 108 Hüküm no: 95 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Niko’nun vefat eden İstati’ye olan borcunu Hassa Beytülmâl Emini Ali Bey b. Mustafa’ya ödemesi Kasaba-i Beşiktaş’da bi’l-fi‘il subaşı ve beytülmâl-ı hâssa emîni olan Ali Bey b. Mustafa nâm kimesne mahfil-i kazâda kasaba-i mezbûre mahallâtından Sinanpaşa mahallesinde vâki‘ Mehmed Bey nâm kimesnenin bostanında sâkin işbu râfi‘ü’s-sifr Yorgi v. Niko nâm zimmî muvâcehesinde üzerine da‘vâ ve takrîr-i kelâm edüp târih-i kitâbdan dört ay mukaddem zikr olunan bostanda sâkin iken hâlik olan İstati nâm zimmînin zâhirde vâris-i ma‘rûfu olmayıp metrûkâtı beytülmâla âid olmağın mezbûr Yorgi’nin zimmetinde hâlik-i merkūm İstati’nin dört yüz akçe ile bazı evsâf-ı nâ-ma‘lûm eşyâsı vardır. Hâlâ emânetim hasebiyle meblağ-ı mezkûr dört yüz akçe ile eşyâ-yı mersûmu taleb ederim suâl olunup alıverilmesi matlûbumdur dedikde gıbbe’s-suâl merkūm Yorgi meblağ-ı mârrü’z-zikr dört yüz akçeyi ikrâr mâ‘adâyı inkâr etmeğin müdde‘î-i mezbûr Ali Bey’den da‘vâsına mutâbık beyyine taleb olundukda ityân-ı beyyineden ızhâr-ı acz ile istihlâf olundukda merkūm Yorgi dahi hâlik-i merkūm İstati’nin dört yüz akçeden gayrı hakkı zimmetinde bir şeyi olmadığına enzele’l-İncîle alâ İsa aleyhisselâm eylemeğin meblağ-ı mezkûr dört yüz akçeyi [28b] mersûm Ali Bey’e edâ ve teslîme mezbûr Yorgi’ye tenbîh olunmağın mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Hasan Beşe b. Abdullah, Yusuf Beşe b. Abdullah, Mustafa Beşe b. Mehmed, Cafer b. Mehmed, Mehmed b. Ramazan Muhzır.