Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 108 Hüküm no: 96 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Mehmed Çelebi b. Osman’ın vârislerinden hanımı Halime Hatun bt. Abdülmennan’ın terekedeki hissene karşılık bir bahçe aldığı Mahmiye-i Galata muzâfâtından kasaba-i Beşiktaş’da vâki‘ Cihânnümâ mahallesinde sâkin iken hacc-ı şerîfe müteveccih oldukda merhûm olan Şerbetçi Mehmed Çelebi b. Osman’ın verâseti zevce-i metrûkesi Halime Hatun bt. Abdülmennan ve sulbî kebîr oğlu Murad Çelebi’ye münhasıra idüği şer‘an mütehakkık oldukdan sonra mezbûr Murad Çelebi mahfil-i kazâda işbu hâfızatü’l-kitâb vâlidesi merkūme Halime Hatun mahzarında ikrâr ve takrîr-i kelâm edüp babam müteveffâ-yı merkūm Mehmed Bey’in cümle muhallefâtından alâ mâ farazallâh vâlidem merkūme Halime Hatun’un sümün hisse-i şer‘iyyesi’çün mahalle-i merkūmede vâki‘ bir tarafı Hasan Paşa bahçesi ve bir tarafı İsmihân Hatun meşrûtu olan menzil ve bir tarafı yine vâlide[m] merkūme Halime Hatun mülkü ve bir tarafı tarîk-i hâs ile mahdûd iki taş binâ yerini ve eşcâr-ı müsmireyi ve bi’r-i mâyı müştemil tahmînen yüz guruş kıymetli hadîkayı şerâit-i câmi‘-i tehârüc-i şer‘î tarîki ile merkūme vâlidem Halime Hatun’a def‘ ve teslîm eyledim ol dahi tesellüm ve kabûl eyleyüp merkūm babam Mehmed Bey’in sâir muhallefâtında kat‘â alâka ve medhali kalmamışdır suâl olunsun dedikde gıbbe’s-suâl cevâbında fi’l-hakīka hâl minvâl-i muharrer üzeredir ber-vech-i tehârüc merkūme bahçeyi sümün hisse-i şer‘iyyem için kabûl ve kabz eyledim deyicek mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel li-sene isneteyn ve sittîn ve elf. Şühûdü’l-hâl: Mustafa Çelebi b. Şaban, Mustafa Çelebi b. Abdullah, Mehmed b. Hürrem Takyeci, el-Hâc Mustafa b. Hüseyin, Halil b. Hüseyin, Ahmed b. Süleyman, Mustafa Çelebi b. Yakub, Mustafa b. Hasan, Ahmed Çelebi