Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 109 Hüküm no: 97 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihân Hatun bt. Yusuf’un kocası olup Malta’da esirken vefat ettiği haberi üzerine başka biriyle evlenmesinde mahzur olmadığı Mahmiye-i Galata muzâfâtından kasaba-i Beşiktaş’da vâki‘ merhûm Kılıçalipaşa mahallesinde sâkin fahrü’l-hutebâ Eşref Efendi b. Veli meclis-i şer‘de mahalle-i mezbûrede sâkine işbu hâfızatü’l-kitâb İsmihân Hatun bt. Yusuf mahzarında üzerine da‘vâ ve takrîr-i kelâm edüp mezbûre İsmihân’ın zevci olup bin on dört senesinde cezîre-i Malta’da esîr olan Ramazan b. Abdullah nâm kimesnenin sıhhati haberi şâyi‘ iken işbu hâzır bi’l-meclis Mahmud nâm kimesneye nefsini tezvîc edüp zifâf olmak üzeredirler suâl olunup kıbel-i şer‘den men‘ u def‘ olunması matlûbumdur deyicek gıbbe’s-suâl mezbûre İsmihân cevâbında zevc-i sâbıkım merkūm Ramazan esîr oldukdan sonra kırk dokuzuncu yayabaşılar odası ahâlîsinden olup Malta’da esîr iken halâs olup bu cânibe gelen Mustafa Beşe b. Mehmed nâm râcil zevcim merkūm Ramazan Malta’da vefât edüp cenâzesine hâzır olduğuna haber verip şehâdet etmekle bu bâbda haber-i vâhid-i adl ile zevce nefsini âhara tezvîce helâl olduğu Kādîhân’da Kitâbü’ş-şehâde’de ve sâir kütüb-i mu‘teberede mastûr ve mukayyed olmağla tis‘a ve erba‘în ve elf Muharremü’l-harâm’ının gurresinde kasaba-i Tophâne’de nâibü’ş-şer‘ olan Mehmed Efendi b. Münir’in hatt u hatemini müştemil târih-i mezbûr ile müverrah yedime hüccet-i şer‘iyye vermekle ber-mûceb-i hüccet-i şerîf Muharrem nâm kimesneye varmış idim hâlâ merkūm Muharrem dahi beni tatlîk edüp iddetim münkaziye olmağla işbu hâzır bi’l-meclis mezbûr Mahmud dahi ber-mûceb-i hüccet nefsimi tezvîc eyleyüp ol dahi huzûr-ı Müslimînde akd-i nikâh edüp beni mehr-i müsemmâ ile almışdır deyüp ibrâz-ı hüccet eyledikde gıbbe’n-nazar ve’l-kırâe min-külli’l-vücûh takrîrine mutâbık oldukda gıbbe’l-istintâk mezbûr Eşref Efendi mazmûn-ı hüccet-i merkūmeyi münkir olıcak zeyl-i kitâbda mastûrü’l-esâmî olan kimesnelerden hakīkat-i hâl istihbâr olundukda fahrü’l-müderrisîni’l-kirâm Dayı Mehmed Efendi b. Mehmed el-Cüyûş, Mehmed Çavuş b. Mustafa nâm kimesneler hâl minvâl-i muharrer üzeredir mazmûn-ı hüccet-i merkūmeye biz şâhidleriz şehâdet dahi ederiz deyü edâ-i şehâdet-i şer‘iyye ve her biri ihbâr eylediklerinde şehâdetleri makbûle olmağın mu‘ârazadan men‘ u def‘ olunup mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-şehri Rebî‘i’l-evvel li-sene isneteyn ve sittîn ve elf. Şühûdü’l-hâl: Bayram Ağa b. Abdullah, Mahmud Çelebi b. Mehmed el-Bevvâb, Ömer Bey b. Abdullah Bağdadî, Ali Çelebi b. (?), Ahmed Çelebi el-Kâtib b. Halil Efendi.