Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 110 Hüküm no: 98 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tersâne-i âmire Kethüdası Ali Kaptan’ın vârislerinin terekeden kendilerine intikal eden köleleri Manol v. Yani’yi azad ettikleri Tersâne-i âmire kethüdâsıyken merhûm olan Ali Kapudân’ın verâseti sulbî sagīr oğulları Mehmed Çelebi ve Halil Çelebi’ye ve vâlideleri zevce-i metrûkesi Belkıs Hatun bt. Abdullah’a münhasıra idüği şer‘an mütehakkık oldukdan sonra sagīrân-ı mezbûrânın tesviye-i umûrlarına vasiyy-i şer‘îleri olan merkūme Belkıs Hatun tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olan Usta Yusuf b. Hamza ve Halil Çelebi b. İbrahim şehâdetleriyle şer‘an vekâleti sâbite olan hocaları fahrü’l-müderrisîn Ali Efendi b. Yusuf meclis-i şer‘de işbu [29b] hâfızü’l-vesîka sık kaşlı elâ gözlü orta boylu Rûmiyyü’l-asl merhûm-ı mezbûrun muhallefâtından olup rıkkına mu‘terif olan Manol v. Yani nâm abd-i memlûklarını kendi meûneti ve sagīrân-ı merkūmânın masârif-i lâzımeleri’çün mukaddemâ müvekkilem müşârun ileyhâ iki yüz tâmmü’l-vezn ve kâmilü’l-ayâr riyâlî guruş-ı kebîre kitâbete kesmiş idi. El-hâletü hâzihî meblağ-ı merkūm iki yüz guruşu merkūm Manol cem‘ ve tahsîl ve teslîm edüp müvekkilem dahi asâleten ve vesâyeten yedinden teslîm ve kabz eyleyüp hâlâ rıkkıyyetten halâs olup bedel-i kitâbetden zimmetinde bir akçe ve bir habbe bâkī kalmamışdır deyicek gıbbe’t-tasdîki’ş-şer‘î vicâhen mâ-hüve’l-vâkı‘ bi’t-taleb ketb olundu. Hurrire fî-evâhiri şehri Rebî‘i’l-evvel li-sene isneteyn ve sittîn ve elf. Şühûdü’l-hâl: Ali Bey b. Abdullah el-Bostânî, Musa Bey b. Ahmed, Yusuf Bey b. Mustafa, Mustafa Bey b. Ahmed, Şaban b. Abdullah, Bâli Çelebi b. Mehmed, Ali Çelebi b. Mehmed, Sinan Reis b. Mehmed ve gayruhüm mine’l-hâzırîn.