Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 111 Hüküm no: 99 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâime bt. Abdullah’ın bazı eşyalarını oğlu Mustafa Beşe b. Mehmed’e hibe ettiği Mahmiye-i Galata’ya tâbi‘ kasaba-i Beşiktaş mahallâtından merhûm Yahya Efendi mahallesinde sâkine Sâime bt. Abdullah nâm Hatun mahfil-i kazâda rızâen oğlu işbu sâhibü’l-kitâb Mustafa Beşe b. Mehmed nâm kimesne mahzarında bi-tav‘ihâ ikrâr ve takrîr-i kelâm edüp silk-i mülkümde münselik yirmi zirâ‘ üstübü bez ve iki köhne gılâf-ı yastık ve iki köhne yemeni yorgan ve bir köhne sagīr tencere ve bir köhne leğen ve bir sagīr tepsi ve bir köhne sandık ve bir köhne ağaç sandık ve bir ağaç sini ve bir köhne gılâf-ı döşek yüzü ve bir köhne sagīr minder ve bir bakır tas ve bir köhne kutu zikr olunan eşyâ-yı merkūmu Mustafa’ya hibe-i sahîha-i şer‘iyye ile hibe ve temlîk ve teslîm ol dahi meclis-i hibede ittihâb ve temellük ve tesellüm eyledi ba‘de’l-yevm zikri mürûr eden eşyâ-yı merkūm Mustafa Beşe’nin mülk-i mevhûbudur kat‘â benim alâka ve medhalim yokdur dedikde mukırre-i mezbûrenin cârî ve sâdır olan ikrârını mezbûr Mustafa Beşe talebiyle ketb olundu. Tahrîren fi’l-yevmi’l-âşir min-Rebî‘i’l-evvel li-sene isneyn ve sittîn ve elf. Şühûdü’l-hâl: İbrahim Efendi el-Müderris, Mehmed Efendi el-İmâm, Ömer Bey‘ b. Mehmed, İbrahim Beşe [b.] Hacı, Murtaza Beşe b. Mehmed.