Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 111 Hüküm no: 100 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad Çelebi b. Mehmed Bey’in borcuna karşılık evini Mehmed Beşe b. Musa’ya rehin verdiği Mahmiye-i Galata’ya tâbi‘ kasaba-i Beşiktaş mahallâtından Cihânnümâ mahallesi sâkinlerinden Murad Çelebi b. Mehmed Bey nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Beşe b. Musa nâm kimesne mahzarında bi-tav‘ihî ikrâr ve takrîr-i kelâm edüp bi-tarîki’l-karz mezbûr Mehmed Beşe yedinden altmış kıt‘a riyâlî guruş-ı kebîr istikrâz eyleyüp ve iki oturak bir kayık dahi kırk riyâlî guruş-ı kebîre iştirâ edüp cem‘an yüz kıt‘a riyâlî guruş mezbûr Mehmed Beşe’ye zimmetimde lâzımü’l-edâ ve vâcibü’l-kazâ deynim olup hâlâ meblağ-ı mezkûr mukābelesinde mahalle-i mezbûrede vâki‘ bir tarafı Süleyman Bey mülkü ve bir tarafı Emetullah Hatun mülkü ve bir tarafı Külhâncı Ali mülkü ve bir tarafı tarîk-i âm ile mahdûd ve mümtâz mülk menzilimi merkūm Mehmed Beşe’ye rehin vaz‘ eyledim dedikde mukırr-ı mezbûr Murad Çelebi’nin vech-i meşrûh üzere cârî ve sâdır olan kelâmını mersûm Mehmed Beşe vicâhen tasdîk ve rehn-i mezkûru kabûl eylemeğin mâ-vaka‘a bi’t-taleb ketb olunup yed-i tâlibe def‘ olundu. Tahrîren fî-selhi min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Fahrü’l-kuzât Abdurrahman Efendi, Nasûh Çelebi b. Musa, Mehmed Çelebi b. Ahmed Efendi, İbrahim Çelebi b. Hasan, Mehmed Beşe b. Receb, Ali Kethüdâ, Ramazan Beşe b. ( ), Mustafa Beşe b. Mehmed, Cafer Beşe b. el-mezbûr, Mehmed b. Ramazan Muhzır ve gayruhüm.