Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 112 Hüküm no: 101 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Malki v. Sabetay’ın vârislerinin babalarının ölmeden önce evini İlya v. Samarina’ya sattığını kabul edip evde hiçbir haklarının olmadığını beyan ettikleri Eğriboz cemâ‘atinden olup bundan akdem hâlik olan Malki v. Sabetay nâm Yahudinin verâseti sulbî kebîr oğlu Sabetay’a ve sulbiye kebîre kızları Kalamira ve Kursun ve İstosyo nâm Yahudiyelere münhasıra idüği şer‘an mütehakkık ve zâhir oldukdan sonra kebîr oğlu mezbûr Sabetay kendi tarafından asâleten ve Kalamira ve Kursun taraflarından dahi ikrâr-ı âti’l-beyâna vekîl olup hasm-ı şer‘î-i câhid mahzarında Yasef v. İlya ve Avraham v. Leko nâm yahudiler şehâdetleriyle şer‘an vekâleti sâbit oldukdan sonra vekâleten meclis-i şer‘-i şerîfde işbu hâfızü’l-vesîka eski İstanbul cemâ‘atinden İlya v. Samarina muvâcehesinde bi’t-tav‘ ve’r-rızâ ikrâr ve takrîr-i kelâm edüp mahmiye-i Galata muzâfâtından kasaba-i Beşiktaş’a tâbi‘ Arnavud nâm karyede vâki‘ bir tarafı Kayalı nâm zimmî mülkü ve bir tarafı bazen Yani v. Mosi ve bazen ümmü’z-zeker mülkleri ve bir tarafı Karakaş Kalfa nâm zimmî ile bazen sâhil-i bahr ve bir tarafı dahi tarîk-i âm ile mahdûd fevkānî iki bâb ve tahtânî yine iki bâb beyti ve bir mahzeni ve kulübeyi ve bahçeyi ve kenîfi müştemil olan mülk menzil cümle tevâbi‘ ve levâhıkı ile babam hâlik-i mezbûrun [30b] mülk-i müşterâsı olup hâl-i hayâtında ve kemâl-i akl ü sıhhatinde merkūm İlya’ya iki bin nakd tâmmü’l-vezn ve kâmilü’l-ayâr riyâlî guruş-ı kebîre tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm edüp kabz-ı semen-i ma‘dûd ve teslîm-i mebî‘-i mahdûd eylediği ma‘lûmumuzdur vechen mine’l-vücûh sâlifü’z-zikr menzilde benim ve müvekkilelerimin kat‘â alâkamız yokdur keyfe mâ yeşâ mutasarrıf olsun deyicek mukırr-ı mezbûru ikrâr-ı meşrûhunda müşterî-i mersûm bi’l-müvâcehe tasdîk ve bi’l-müşâfehe tahkīk etmeğin mâ-hüve’l-vâkı‘ bi’t-taleb ketb olundu. Hurrire fi’l-yevmi’s-sâmin ve’l-ışrîn min-şehri Rebî‘i’l-evvel li-sene isneteyn ve sittîn ve elf. Şühûdü’l-hâl: Mefharü’l-küttâb Ahmed Efendi, Mehmed Çelebi b. Ramazan, Mustafa Çelebi [b.] Ramazan, Mustafa b. Mehmed, Cafer b. Mehmed, Mordehay v. Kiriyan, Petso v. Haym, Yakob v. Petso, David v. Samsam, Yani v. Kose, Kirso Methami? ve gayruhüm.