Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 113 Hüküm no: 102 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortaköy’de Ermeni mahallesinde Asvader v. Pedir’e ait evin kilise olarak kullanıldığı şikayetinin aslı olmadığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sükkânından Mahmud Efendi b. Mehmed el-İmâm ve İbrahim Halîfe b. Halil el-Müezzin ve Pîrî Bey b. Erdoğdu ve Arslan Beşe b. Hasan ve Mehmed Beşe [b.] Hasan ve Receb Beşe b. Ahmed ve cemm-i gafîr ve cemm-i kesîr meclis-i şer‘-i şerîf-i lâzımü’t-teşrîfde herbiri takrîr-i kelâm edüp karye-i mezbûrede öteden beri Ermeni kilisesi olmayıp Ermeni mahallesi sâkinlerinden Asvader v. Pedir nâm Ermeni’nin mahalle-i merkūmede vâki‘ bir bâb odasını tâife-i Ermeniyân oda-i mezkûru tahliye edüp ve Pazar günleri zikr olunan odaya cem‘ olup kilise olmak üzere âyin-i bâtıllarını icrâ ederler deyü mesmû‘umuz olmuşdur. Cânib-i şer‘den üzerine varılup vâki‘ hâl keşf ve tahrîr ve men‘ olunması matlûbumuzdur dediklerinde bu fakīr zeyl-i kitâbda mastûrü’l-esâmî olan Müslimîn ile zikri mürûr eden odaya varup keşf ve müşâhede olundukda zikr olunan oda Derviş v. Nehabit nâm Ermeni’nin taht-ı icâresinde olup esâs-ı beyt ve sâir levâzım-ı beyti dahi mevcûd olduğu [31a] hâlde merkūm Derviş sâkin olup ve kiliseye müte‘allik alâimden bir şey olmadığını mu‘âyene ve müşâhede olundukda vâki‘ hâl tâife-i mezbûre talebiyle mahallinde ketb ü terkīm olundu. Tahrîren fi’l-yevmi’s-sânî ve’l-ışrîn min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Ali Bey b. Mustafa, Mehmed Beşe b. Hasan, Bayram Beşe b. Musa, Mehmed Beşe b. Süleyman, Mustafa Beşe b. Mehmed, Mehmed Çelebi b. Halil, Mehmed Çelebi b. Ramazan, Cafer Beşe b. Mehmed, Mehmed Çelebi b. Ahmed, Mustafa Beşe b. Mehmed ve gayruhüm.