Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 113 Hüküm no: 103 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun bt. Halil Efendi’nin vârislerinin hisselerini vasiden teslim alıp buna karşılık bir evi rehin gösterdikleri Mahmiye-i Galata muzâfâtından kasaba-i Beşiktaş’da vâki‘ Sultân Süleyman Hân tâbe serâhû mahallesinde sâkine iken merhûme olan Hadice Hatun bt. Halil Efendi’nin verâseti zevc-i metrûkü Veli b. Şaban’a ve vâlidesi Halime Hatun bt. Osman’a ve sadrî sagīr oğlu Mehmed’e münhasıra idüği şer‘an mütehakkık oldukdan sonra müteveffât-ı mezbûrenin li-ebeveyn karındaşı ve sagīr-i mezbûrun vasiyy-i mansûbu olmağla metrûkâtına vâzı‘ü’l-yed olan Ahmed Efendi mahfil-i kazâda eniştesi mezbûr Veli muvâcehesinde takrîr-i kelâm edüp merkūm Veli’ye rub‘ hisse-i şer‘iyyesi’çün ber-mûceb-i defter-i kassâm on beş bin yüz altmış iki akçe bir defa bin yedi yüz seksen dokuz akçe ve onu on bir buçuk hesâbı üzere sagīr-i mezbûr Mehmed’in sekiz bin sekiz yüz kırk bir akçesini dahi merkūm Veli’ye def‘ ve teslîm eyledim cem‘an on iki bin altı yüz otuz akçe hisselerini benim yedimden ahz u kabz eylemişdir suâl olunsun deyicek gıbbe’s-suâl mezbûr Veli cevâbında fi’l-hakīka ber-mûceb-i defter-i kassâm rub‘ hissem olan üç bin yedi yüz seksen dokuz akçe hissemi ve onu on bir buçuk hesâbı üzere sagīr-i mezbûrun dahi sekiz bin sekiz yüz kırk bir akçesini dahi vasiyy-i mezbûr yedinden istidâne tarîkiyle ahz u kabz mukābelesinde mahalle-i mezbûrede vâki‘ ma‘lûmü’l-hudûd tahtânî iki bâb odayı ve iki sofayı ve müşterek bi’r-i mâyı ve hadîka ve kenîfi müştemil mülk menzilim vasiyy-i mârrü’z-zikr yedinde rehn-i makbûzdur deyicek gıbbe’t-tasdîki’ş-şer‘î vicâhen mâ-hüve’l-vâkı‘ bi’t-taleb ketb olundu. Fi’l-yevmi’l-hâmis ve’l-ışrîn min-şehri Rebî‘i’l-evvel li-sene isneteyn ve sittîn ve elf. Şühûdü’l-hâl: Kâtibü’l-hurûf Abdurrahman el-Kadı, Muslu Çelebi b. Musa, Mehmed Çelebi b. Ahmed Efendi, Yahya Çelebi b. Hasan, Ahmed Çelebi b. Esad Efendi.