Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 114 Hüküm no: 104 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atanaş v. Manol’ün bağını Ahmed Beşe b. Mustafa’ya sattığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Atanaş v. Manol nâm zimmî mahfil-i kazâda işbu râfi‘ü’l-kitâb Ahmed Beşe b. Mustafa mahzarında ikrâr ve takrîr-i kelâm edüp karye-i mezbûrede vâki‘ bir tarafı merhûm Yahya Efendi tarlası ve bir tarafı Karacaoğlu demekle ma‘rûf zimmî bağı ve bir tarafı Haim Yahudi arsası ve bir tarafı yine kendi bağım ile mahdûd tahmînen iki dönüm mikdârı mülk bağımı mezbûr Ahmed Beşe’ye iki bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzere iştirâ ve tesellüm ve kabz eyledikden sonra semeni olan meblağ-ı mârrü’z-zikr iki bin akçeyi yedinden bi’t-tamâm ve’l-kemâl ahz u kabz eyledim. Ba‘de’l-yevm zikr olunan bağ merkūm Ahmed Beşe’nin mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr Atanaş’ın cârî ve sâdır olan ikrârını el-mukarru lehü’l-merkūm Ahmed Beşe bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fî selhi min-şehri Rebî‘i’l-evvel li-sene isneyn ve sittîn ve elf. Şühûdü’l-hâl: Fahrü’l-kuzât Abdurrahman Efendi, Mustafa Çelebi el-Hammâmî, Receb Beşe b. Ali, Ahmed Beşe b. el-mezbûr, Mehmed Beşe b. Hasan, Arslan Beşe b. Hasan, Hüseyin Beşe b. Abdullah, Mustafa Beşe Muhzır.