.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 172
Hüküm no: 125
Orijinal metin no: [34b-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Bakkal Balaş’ın alacak iddiasında anlaşma sağlanması

Ma‘rûz-ı dâ‘î-i Devlet-i aliyyeleridir ki

Bakkāl tâifesinden arzuhâl eden Balaş v. Kiryako nâm zimmî Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘de medîne-i Üsküdar’da Kassâm Çeşmesi civârında sâkine derûn-ı arzuhâlde ismi mezkûre zâtı mu‘arrefe Atiyetullah bt. Ali nâm hatun muvâcehesinde mezbûre Atiyetullah Hatun zimmetinde bundan akdem malımdan ve yedimden iştirâ ve kabz eylediği bakkāl emti‘ası semeninden yedi yüz kırk dört guruş alacak hakkım olup hattâ işbu sene-i mübâreke Recebi’l-ferdinin onuncu günü İstanbul’da Avratpazarı nezdinde Hacı Hasan dükkânı demekle arîf mütemekkin olduğum bakkāl dükkânı pîş-gâhında mezbûre Atiyetullah Hatun ile hesâbımızı rü’yet eylediğimiz hînde meblağ-ı mezkûr yedi yüz kırk dört guruş zimmetinde bana deyni olduğunu ikrâr dahi etmekle meblağ-ı mezkûru mezbûre Atiyetullah Hatun’dan hâlâ taleb ederim deyü da‘vâ eylediğimde ol dahi külliyen inkâr [35a] etmekle ben ber-vech-i muharrer müdde‘âmı Çizmeci esnâfından Süleyman Ağa b. Ali ve Mehmed b. Hasan nâm kimesneler şehâdetleriyle bi’l-muvâcehe vech-i şer‘î üzere ba‘de’l-isbât meblağ-ı mezkûr yedi yüz kırk dört guruşu merkūme Atiyetullah Hatun’a hüküm esnâsında muslihîn tavassutuyla beynimiz ıslâh ve tanzîm olunup ben ber-vech-i muharrer tasaddî eylediğim da‘vâ-yı mezkûremden rızâmla beş yüz elli guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûre müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledi deyü ba‘de’l-ikrâr ve’t-tasdîk, ibrâdan müstesnâ bedel-i sulh-ı mezkûr beş yüz elli guruşun müdde‘î-i mesfûr Balaş zimmîye bi’t-taleb edâsıyla mezbûre Atiyetullah Hatun ilzâm olunduğu tescîl ve huzûr-ı âlîlerine i‘lâm olundu. El-emru li-men-lehü’l-emr.

Fi’l-yevmi’s-sâmin aşer min-Şevvâli’l-mükerrem li-sene sitte ve hamsîn ve mi’eteyn ve elf.