Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 119 Hüküm no: 112 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Memi’nin evini Rahime Hatun bt. Şaban’a sattığı Mahmiye-i Galata’ya tâbi‘ kasaba-i Beşiktaş’a tâbi‘ Sinanpaşa mahallesinde sâkine Emine Hatun bt. Memi tarafından menzil-i âti’l-beyânı bey‘a vekîl olup nehc-i mu‘teber-i şer‘î üzere vekâleti sâbite olan sadrî oğlu Mehmed Çelebi mahfil-i kazâda işbu sâhibetü’l-kitâb Rahime Hatun bt. Şaban tarafından ikrâr-ı âti’l-beyânı tasdîka vekîl olup nehc-i mu‘teber-i şer‘î üzere vekâleti sâbit olan zevci fahrü’l-hutebâ Eşref Efendi b. Veli muvâcehesinde bi’l-vekâle ikrâr ve takrîr-i kelâm edüp müvekkilem merkūme Emine Hatun’un mahalle-i mezbûrede vâki‘ ma‘lûmü’l-hudûd fevkānî ve tahtânî iki bâb beyti ve bir bâb mahzeni ve iki bi’r-i mâ ve eşcâr-ı müsmire ve gayr-i müsmire hadîkayı ve dehlîzi ve kenîfi hâvî menzilini cümle tevâbi‘ ve levâhıkı ile merkūme Rahime Hatun’a yirmi beş bin nakd-i fıddî-i Osmânî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabz eyledikden sonra semeni olan meblağ-ı mârrü’z-zikr yirmi beş bin mezbûrü’n-na‘t akçeyi yedinden bi’t-tamâm ve’l-kemâl ahz u kabz eyledi [34a] ba‘de’l-yevm mülk-i müşterâsıdır keyfe mâ teşâ ve tehtâr mutasarrıfe olsun deyicek vekîl-i merkūm Mehmed Çelebi’yi ikrâr-ı meşrûhunda vekîl-i diğer Eşref Efendi bi’l-müvâcehe tasdîk ve bi’l-müşâfehe tahkīk edicek mâ-vaka‘a bi’t-taleb ketb olundu. Hurrire fi’l-yevmi’l-ışrîn min-şehri Rebî‘i’s-sânî li-sene isneteyn ve sittîn ve elf. Şühûdü’l-hâl: Mahmud Ağa b. Ömer Ağa, Mehmed Ağa b. el-mezbûr, Receb Bey el-Bevvâb, Ali Bey b. Kurd, Abdülkerim Çelebi el-İmâm, Bâli Bey b. Abdullah, Bayram Ağa b. ( ), diğer Bayram Ağa b. ( ), Mustafa Halîfe b. Yakub, Enver Efendi b. İslam, el-Hâc Yusuf b. ( ), Mahmud Çelebi b. Mehmed, İbrahim Çelebi b. Mustafa ve gayruhüm.