Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 120 Hüküm no: 113 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Memi’nin arsasını Eşref Efendi b. Veli’ye hibe ettiği Mahmiye-i Galata muzâfâtından kasaba-i Beşiktaş’a tâbi‘ Sinan Paşa-yı Cedîd mahallesinde sâkine Emine Hatun bt. Memi tarafından hibe-i âti’l-beyânı ikrâra vekîl olup mezbûreyi ma‘rifet-i şer‘iyye ile ârifân olan Süleyman Bey b. Mehmed ve Abdüllatif Çelebi b. Mustafa şehâdetleriyle şer‘an vekâleti sâbite olan sadrî oğlu Mehmed Çelebi meclis-i şer‘de işbu hâfızü’l-kitâb Eşref Efendi b. Veli muvâcehesinde bi’l-vekâle ikrâr ve takrîr-i kelâm edüp müvekkilem mezbûre Emine Hatun’un mahalle-i merkūmede vâki‘ bir tarafı Murad Ağa mülkü ve bir tarafı Mehmed Reis mülkü ve iki tarafı yine müvekkilem mülkü ile mahdûd tûlen ve arzen on bir zirâ‘ bi-hesâb-ı şatrancî cem‘an yüz zirâ‘ arsa-i hâliyesini merkūm Eşref Efendi’ye hibe-i sahîha-i şer‘iyye ile hibe ve temlîk ve teslîm edüp ol dahi meclis-i hibede ittihâb ve temellük ve tesellüm eyledikden sonra mevhûbün leh merkūm Eşref Efendi mukābele-i hibede bir donluk Mısrî alaca ta‘vîz ve teslîm ve müvekkilem dahi ta‘avvuz ve kabûl eyledi ba‘de’l-yevm arsa-i mezkûre mezbûr Eşref Efendi’nin mülk-i mevhûbudur keyfe mâ yeşâ ve yehtâr mutasarrıf olsun dedikde mukırr-ı mezbûru ikrâr-ı meşrûhunda el-mukarru lehü’l-merkūm Eşref dahi bi’l-müvâcehe tasdîk ve bi’l-müşâfehe tahkīk etmeğin sıhhat-i hibe ve ittihâba hüküm birle bu hurûf ketb olundu. Fi’l-yevmi’t-tâsi‘ aşer min-şehri Rebî‘i’s-sânî li-sene isneteyn ve sittîn ve elf. Şühûdü’l-hâl: Es-sâbıkūn.