Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 121 Hüküm no: 114 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasilici bt. Tarandafilo’nun bağını İskolo v. Anaştaş’a sattığı Mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karyede sâkine Vasilici bt. Tarandafilo nâm zimmiyye tarafından bey‘-i âti’l-beyânı ikrâr etmeğe vekîl olup Yanaki v. Teranoz ve Hristodori v. İlya şehâdetleri ile hasm-ı câhid mahzarında şer‘an vekâleti sâbit olan zevci İsborkoz v. Tarandafilo nâm kuyumcu mahfil-i kazâda işbu sâhibü’l-kitâb İskolo v. Anaştaş nâm zimmî muvâcehesinde bi’l-vekâle ikrâr ve i‘tirâf edüp müvekkilem merkūme zevcem Vasilici’nin mülk-i mevrûsu olup karye-i mezbûre bağları hudûdunda dâhil bir tarafı el-Hâc Ali mülkü ve bir tarafı Ali b. Ferhad bağı ve bir tarafı Ağya nâm Ermeni bağı ve bir tarafı Yani nâm zimmî bağıyla mahdûd iki dönüm mülk bağını iki bin nakd-i fıddî-i Osmânî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabûl ve kabz eyledikden sonra semeni olan meblağ-ı mârrü’z-zikr iki bin mezbûrü’n-na‘t akçeyi yedinden ahz u kabz eyledi ba‘de’l-yevm sâlifü’z-zikr bağ merkūm İskolo’nun mülk-i müşterâsıdır keyfe mâ yeşâ ve yehtâr mutasarrıf olsun deyicek vekîl-i merkūm İsborkoz’u ikrâr-ı meşrûhunda müşterî-i mezbûr İskolo’yu bi’l-müvâcehe tasdîk etmeğin mâ-vaka‘a bi’t-taleb ketb olundu. Fî-gurre-i Cemâziyelevvel li-sene isneyn ve sittîn ve elf. Şühûdü’l-hâl: Mehmed b. Şaban, Mehmed Beşe b. Abdullah, Kasım b. Musa Berber, Mustafa Beşe b. Abdullah.