Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 121 Hüküm no: 115 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı köle Dirahşan bt. Abdullah’ın vefat eden Çaşnigir Mehmed Bey b. Mahmud’un azadlısı olduğunu ispat ettiği İşbu hâfızatü’l-kitâb açık kaşlı elâ gözlü kasîretü’l-kāme Rusiyyetü’l-asl Dirahşan bt. Abdullah’dan meşhûdün-bih âti’l-beyân vechi üzere da‘vâ-yı sahîha-i şer‘iyye ile mesbûk istişhâd-i şer‘î sudûrundan sonra udûl-i ricâlden Mustafa Çelebi b. Mehmed ve diğer Mustafa Beşe b. Veli nâm kimesneler meclis-i şer‘-i hatîr-i lâzımü’t-tevkīrde hasm-ı şer‘î-i câhid [mahzarında] mahmiye-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesinde sâkin iken bundan akdem fevt olan Çaşnigîr Mehmed Bey b. Mahmud’un muhallefâtına vâzı‘atü’l-yed olan zevce-i metrûkesi Emine bt. Memi nâm hatun tarafından husûs-ı âti’z-zikre vekîl olup mezbûreyi ma‘rifet-i şer‘iyye ile ârifân olan Mehmed Çelebi b. Veli ve Mustafa Çelebi b. Yusuf nâm kimesneler şehâdetleri ile şer‘an vekâleti sâbite olan Cafer Bey b. Ahmed nâm kimesne mahzarında herbiri şöyle edâ-i şehâdet-i şer‘iyye eylediler ki merhûm-ı mezbûr müsteşhide-i merkūmeyi hâl-i hayâtında ve kemâl-i akl [ü] sıhhatinde târih-i kitâbdan bir sene mukaddem i‘tâk-ı sahîh-i şer‘î ile i‘tâk eyledi biz bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın merkūme Dirahşan sâir harâir-i asliyyât gibi hürre olmağın mâ-vaka‘a bi’t-taleb ketb olundu. Tahrîren fi’l-yevmi’l-hâmis min-Cemâziyelevvel li-sene isneteyn ve sittîn ve elf. Şühûdü’l-hâl: Mahmud Efendi b. Mehmed, Mehmed Çelebi b. Mahmud, Enver Efendi b. İslam, Ali Çelebi b. Cafer Bey, Ömer Bey b. Abdülmennan, Ali Çelebi b. Mustafa, Esad Çelebi b. Ebûbekir, Ali Bey b. Mustafa, Mustafa Beşe b. Mehmed, Cafer Beşe b. el-mezbûr, Mehmed Çelebi b. Ramazan ve gayruhüm.