Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 122 Hüküm no: 116 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı köle Pâyidâr bt. Abdullah’ın vefat eden Çaşnigir Mehmed Bey b. Mahmud’un azatlısı olduğunu ispat ettiği İşbu hâfızatü’l-kitâb orta boylu açık kaşlı elâ gözlü Rusiyyetü’l-asl Pâyidâr bt. Abdullah’dan meşhûdün-bih âti’l-beyân vechi üzere da‘vâ-yı sahîha-i şer‘iyye ile mesbûk istişhâd-i şer‘î sudûrundan sonra udûl-i ricâlden Mustafa Çelebi b. Mehmed ve diğer Mustafa Beşe b. Veli nâm kimesneler meclis-i şer‘-i hatîr-i lâzımü’t-tevkīrde hasm-ı şer‘î-i câhid [mahzarında] mahmiye-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesinde sâkin iken fevt olan Çaşnigîr Mehmed Bey b. Mahmud’un muhallefâtına vâzı‘atü’l-yed olan zevce-i metrûkesi Emine bt. Memi nâm hatun tarafından husûs-ı âti’z-zikre vekîl olup mezbûreyi ma‘rifet-i şer‘iyye ile ârifân olan Mehmed Çelebi b. Veli ve Mustafa Çelebi b. Yusuf nâm kimesneler şehâdetleri ile şer‘an vekâleti sâbite olan Cafer Bey b. Ahmed nâm kimesne mahzarında herbiri şöyle edâ-i şehâdet-i şer‘iyye eylediler ki merhûm-ı mezbûr müsteşhide-i merkūmeyi hâl-i hayâtında ve kemâl-i akl [ü] sıhhatinde târih-i kitâbdan bir sene mukaddem tedbîr-i mukayyed ile müdebbere eyleyüp fevtimden kırk gün evvel âzâd olsun dedi biz bu husûsa şâhidleriz şehâdet dahi ederiz deyü herbiri [edâ-i] şehâdet-i şer‘iyye [35a] eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın merkūme Pâyidâr merhûm-ı mezbûrun cümle malından âzâd olup sâir harâir-i asliyyât gibi hürre olup hakk-ı velâdan mâ‘adâ üzerinde bir kimesnenin hakkı yokdur. Tahrîren fi’l-yevmi’l-hâmis min-Cemâziyelevvel li-sene isneteyn ve sittîn ve elf. Şühûdü’l-hâl: Şuhûdü’s-sâbıkūn, şuhûdü’s-sâbıkūn