|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 173 Hüküm no: 126 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Nesibe Hatun’un vefat eden eşi Yüzbaşı Hüseyin Ağa’nın mirasından dolayı kayınvalidesi Saliha bt. Halil aleyhindeki davadan vazgeçmesi
Ma‘rûz-ı dâ‘î-i Devlet-i aliyyeleridir ki
Medîne-i Üsküdar’da vâki‘ Selami mahallesi ahâlîsinden ve asâkir-i muntazama-i Şâhâne yüzbaşılarından olup Anadolu’da Erzincan kazâsı civârında Birecik kasabasında sâkine iken bundan akdem vefât eden Hüseyin Ağa b. Halil’in verâseti zevce-i menkûha-i metrûkesi Şerife Nesibe bt. Ali nâm hatun ile vâlidesi Saliha bt. Halil nâm hatuna münhasıra terekesinin rub‘u zevcesi mezbûreye ve selâse-i erbâ‘ı vâlidesi mezbûre Saliha Hatun’a isâbeti tahakkukundan sonra sâhibe-i arzuhâl mu‘arrefetü’z-zât zevce-i mezbûre Şerife Nesibe Hatun Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde tereke-i müteveffâ-yı mezbûra bi’l-verâse vaz‘-ı yedi mütehakkık olan derûn-ı arzuhâlde mezkûretü’l-ism kezâlik zâtı mu‘arrefe ümm-i mezbûre Saliha Hatun muvâcehesinde mûrisimiz zevcim müteveffâ-yı mezbûrun bi’l-cümle terekesine kayınvâlidem mezbûre Saliha Hatun bi’l-verâse vâzı‘atü’l-yed olmağla tereke-i müteveffâ-yı mezbûrdan olarak mecmû‘u sekiz yüz guruş kıymetli dört tencere ve bir ta‘âm sinisi ve bir nühâs mangal ve bir sagīr tas ve iki kilim ve kahve değirmeni ve dört sahan ve bir şorba tası ve bir kadayıf tepsisi ve bir yorgan ve bir şilte ve bir ihrâm ve bir mir’ât ve dokuz yasdık ve bir sagīr leğen kayınvâlidem mezbûre Saliha Hatun fuzûlî ahz ve ketb ü ihfâ etmekle eşyâ-i muharrere-i mezkûre mevcûde ise a‘yânını müstehleke ise ba‘de’s-sübût kıymet-i mezkûrelerinden ber-vech-i muharrer hisse-i irsiye-i şer‘iyyemi mezbûre Saliha Hatun’dan bi’l-verâse tazmîn taleb ederim deyü inkârına mukârin tasaddî eylediğim da‘vâmdan rızâmla meccânen fâriğa olmamla bi’l-cümle husûs-ı mezbûra ve zevcim müteveffâ-yı mezbûrun kalîl ü kesîr [ve] celîl ü hakīr, nükūd ve urûz ismi mâl ıtlâk olunur tereke-i ma‘lûme ve mechûlesine ve hukūk-ı mîrâsa ve işbu târîhe gelince sâir cemî‘ hukūk-ı şer‘iyyeye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr-ı âlîlerine i‘lâm olundu. El-emru li-men-lehü’l-emr.
Fî 21 L sene 1256.
|