Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 125 Hüküm no: 122 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğlence bt. Abdullah’ın evini Hacı Hüseyin b. Hasan’a sattığı Mahmiye-i Galata’ya tâbi‘ kasaba-i Beşiktaş mahallâtından Sinan Paşa-yı Cedîd mahallesi sâkinelerinden Eğlence bt. Abdullah nâm hatun tarafından menzil-i âti’l-beyânı bey‘a vekîl olup mezbûreyi ma‘rifet-i şer‘iyye ile ârifân olan Mahmud Efendi b. Mehmed ve Mehmed Çelebi b. Mahmud Efendi nâm kimesneler şehâdetler ile şer‘an vekâleti sâbite olan zevci Sefer Reis b. Mustafa nâm kimesne meclis-i şer‘-i şerîf-i lâzımü’t-teşrîfde işbu sâhibü’l-kitâb el-Hâc Hüseyin Bey b. Hasan nâm kimesne mahzarında bi’l-vekâle ikrâr ve takrîr-i kelâm edüp müvekkilem mezbûrenin mahalle-i mezbûrede vâki‘ bir tarafı Meryem Hatun mülkü ve bir tarafı tarîk-i âm ve iki tarafı mezbûr el-Hâc Hüseyin Bey mülkü ile mahdûd fevkānî bir bâb odayı ve önünde nîm sofayı ve bir bi’r-i mâyı ve eşcâr-ı müsmire ve gayr-ı müsmireyi hâvî hadîkayı ve kenîfi müştemil mülk menzilini cümle tevâbi‘ ve levâhıkı ile mersûm el-Hâc Hüseyin Bey’e on iki bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm ve kabz eyledikden sonra semeni olan meblağ-ı mezkûru ahz u kabz eyledi ba‘de’l-yevm menzil-i sâlifü’z-zikr merkūm el-Hâc Hüseyin Bey’in mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr Sefer Reis’in bi’l-vekâle cârî ve sâdır olan ikrârını merkūm el-Hâc Hüseyin Bey bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâdî aşer min-Cumâdelûlâ li-sene isneyn ve sittîn ve elf. Şühûdü’l-hâl: Osman Usta b. Hüseyin, Veli Usta b. Hüseyin, Mustafa Çelebi b. Süleyman, Ebûbekir Çelebi b. Ebûbekir, Ali Beşe b. Abdullah, Abdülkerim Çelebi el-İmâm, Mustafa Çelebi b. Ahmed, Ali Çelebi Müezzin, Mehmed Çelebi b. Ramazan, Mustafa b. Abdullah.