Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 126 Hüküm no: 123 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi b. Hüseyin’in Hatice Hatun bt. Sefer’e ait arsayı daha önce satın aldığını tescil ettirdiği Mahmiye-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinlerinden işbu sâhibü’l-kitâb Hasan Efendi b. Hüseyin nâm kimesne mahfil-i kazâda Hadice Hatun bt. Sefer tarafından ikrâr-ı âti’l-beyânı tasdîka nehc-i mu‘teber-i şer‘î üzere vekîl olan oğlu Mustafa Çelebi b. Şaban Ağa nâm kimesne mahzarında ikrâr ve i‘tirâf edüp mahalle-i mezbûrede vâki‘ bir tarafı Ali Bey mülkü ve iki tarafı mezbûre Hadice Hatun mülkü ve bir tarafı tarîk-i hâs ile mahdûd tûlen on zirâ‘ ve arzen sekiz zirâ‘ arsa-i hâliye üzerinde vâki‘ kendi mâlım ile binâ eylediğim bir bâb fevkānî ve bir bâb tahtânî beyti ve sofayı ve kenîf ve muhavvatayı müştemil mülk menzilin arsasını târih-i kitâbdan bir buçuk sene mukaddem merkūme Hadice Hâtûn’dan iştirâ edüp lâkin yedime hüccet-i şer‘iyye vermemiş idi suâl olunup takrîri tahrîr ve yedime hüccet-i şer‘iyye verilmesi matlûbumdur dedikde gıbbe’s-suâl vekîl-i mezbûr Mustafa Çelebi cevâbında fi’l-hakīka hudûd-ı mezkûr ile mahdûd olan menzilin arsasını müvekkilem mezbûre Hadice Hatun târih-i mersûmda merkūm Hasan Efendi’ye on sekiz riyâlî guruş-ı kebîre bey‘-i kat‘î ile bey‘ edüp ve kabz-ı semen eylemişdir târih-i mersûmdan [37a] arsa-i mezkûre merkūm Hasan Efendi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde vekîl-i merkūm Mustafa Çelebi’nin cârî ve sâdır olan kelâmını merkūm Hasan Efendi talebiyle ketb olundu. Tahrîren fi’l-yevmi’s-sâmin aşer min-Cumâdelûlâ li-sene isneteyn ve sittîn ve elf. Şühûdü’l-hâl: Abdüsselâm Çelebi b. Receb Kethüdâ, Abdülkerim Çelebi el-İmâm, Cafer Efendi b. Şükrüllah, Ali Çelebi el-Müezzin, Ali Beşe b. Abdullah, Ali Bey b. Abdullah, Hüseyin Beşe b. Abdullah, Mustafa Çelebi b. Ahmed, Mehmed Çelebi b. Mahmud ve gayruhüm.