Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 127 Hüküm no: 124 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun bt. Ahmed’in, vefat eden kocası Muslu Bey’de Osman Bey b. Hüseyin Paşa’nın alacağı olmadığını tescil ettirdiği Mahmiye-i Galata’ya tâbi‘ kasaba-i Beşiktaş mahallâtından merhûme Hânım Hatun mahallesi sükkânından umdetü’l-emâcid ve’l-a‘yân Osman Bey b. el-merhûm Hüseyin Paşa’nın Halebü’ş-şehbâ’da vâki‘ ze‘âmeti mahsûlünü cem‘ ve tahsîle vekîl-i şer‘îsi olup bundan akdem müteveffâ olan Muslu Bey b. ( ) nâm kimesnenin zevce-i metrûkesi olmağile muhallefâtına vâzı‘atü’l-yed olan Fâtıma Hatun bt. Ahmed tarafından husûs-ı âti’l-beyâna vekîl olup nehc-i mu‘teber-i şer‘î üzere vekâleti sâbite olan li-ebeveyn karındaşı Sefer Bey nâm kimesne meclis-i şer‘-i şerîfde müşârun ileyh Osman Bey mahzarında bi’l-vekâle takrîr-i kelâm edüp müşârun ileyh Osman Bey’in taraf-ı karînü’ş-şereflerinde hâlâ mahsûl-i ze‘âmet-i mezkûreyi cem‘ ve tahsîle vekîl-i şer‘îsi olan ( ) nâm kimesne müvekkilem mezkûreden bî-vech bazı bakāyâ taleb edüp rencîdeden hâlî değildir fi’l-hakīka merhûm-ı mezbûr zimmetinde müşârun ileyh Osman Bey’in hakk-ı şer‘îsi var mıdır suâl olunup ihkāk-ı hak olunması matlûbumdur dedikde gıbbe’s-suâl müşârun ileyh Osman Bey cevâbında merhûm-ı mezbûr Muslu Bey zimmetinde mahsûl-i ze‘âmetimden ve sâir hukukdan bir akçe ve bir habbe hakkım yokdur husûs-ı mezbûra müte‘allik da‘vâ benden bizzât veya vekîlimden bi’l-vekâle sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde müşârun ileyh Osman Bey’in cârî ve sâdır olan kelâmını vekîl-i mersûm Sefer Bey talebiyle ketb olundu. Tahrîren fi’l-yevmi’s-sâmin aşer min-Cumâdelûlâ li-sene isneyn ve sittîn ve elf. Şühûdü’l-hâl: İsmail Bey el-Bevvâb-ı sultânî, Ahmed Efendi b. Halil Efendi, Mehmed Çelebi b. Yusuf Çelebi, Yahya Çelebi el-Müezzin, Şehbaz b. Abdullah, Dilâver b. Abdullah.