Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 128 Hüküm no: 126 Orijinal metin no: [37b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın kocası Mustafa Çelebi ile anlaşarak boşandığı (muhâla‘a) Mahmiye-i Galata tevâbi‘inden Beşiktaş kasabası mahallâtından Maçka mahallesinde sâkine Âişe bt. Abdullah nâm hatun meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzıra olup râfi‘-i hâze’l-kitâb Mustafa Çelebi b. Mehmed nâm zevci ile muhâla‘a etti. Zevc-i mezbûr dahi nikâhında ma‘kūdün-aleyh râyicü’l-vakt iki bin iki yüz akçe mehr-i müecceli, ilm-i şer‘î ile beynlerinde ma‘lûm nafaka-i iddeti ve meûnet-i süknâsı mukābelesinde zevce-i mezbûresi ile hul‘ eyledi. Mezbûre Âişe bu sûretle akd-i cedîd ve mehr-i müste’nif olmadan zevc-i mezkûra helâl olmayacak şekilde bâyinen ayrılmış oldu. Sonra hukūk-ı zevciyyete müte‘allik cemî‘ de‘âvî, eymân, mutâlebât ve muhâsamâtdan her biri diğerinin zimmetini ibrâ-yı âmm-ı kātı‘an li’n-nizâ‘ ve râfi‘an li’l-husûmet ile ibrâ etti. Cerâ zâlike ve hurrire fi’l-yevmi’s-sâdis ve’l-ışrîn min-Cumâdelûlâ li-sene isneteyn ve sittîn ve elf. Şühûdü’l-hâl: Ahmed Çelebi b. Mehmed, Mehmed Çelebi b. Mustafa, Hasan Çelebi b. Ahmed, İlyas Bey b. Hasan, Handan Bey b. Abdullah, Mustafa Bey b. Halil, Mehmed Çelebi b. Mustafa, Mahmud Çelebi b. İbrahim, Mustafa Beşe b. Pîrî, Süleyman Beşe b. Abdullah, Ahmed Beşe b. Mehmed, Mustafa b. Mehmed muhzır ve gayrühüm