|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 173 Hüküm no: 127 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Rukiye Hatun’un boşandığı eşi Numan Bey’de olan alacaklarının tahsili talebi
Ma‘rûz,
Mahrûse-i Galata’ya muzâfe kasaba-i Beşiktaş’da Süleymâniye mahallesinde sâkine sâhibe-i arzuhâl mu‘arrefetü’z-zât Şerife Rukiye Hanım bt. Ali Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde medîne-i Üsküdar civârında Bülbülderesi’nde sâkin derûn-ı arzuhâlde mezkûrü’l-ism hademe-i hâssadan muhrec Numan Bey b. Mehmed Nazif muvâcehesinde mûmâ-ileyh Numan Bey dört yüz elli bir guruş mehr-i müeccel tesmiyesiyle zevc-i dâhilim iken işbu târîh-i i‘lâmdan üç gün mukaddem beni bâyinen tatlîk etmekle mezbûrun zimmetinde mütekarrir ve ma‘kūdün-aleyh mehr-i müeccel-i mezkûrum olan dört yüz elli bir guruş ile bundan akdem malımdan ve yedimden iktirâz ve kabz ve umûruna sarfla istihlâk eylediği bir def‘a bin beş yüz guruş ve bir def‘a dahi dört yüz elli guruş ki min-haysü’l-mecmû‘ mezkûr üç bin dört yüz bir guruşu zevcem mûmâ-ileyh Numan Bey’den hâlâ taleb ederim deyü da‘vâ etdikde, mûmâ-ileyh Numan Bey dahi cevâbında kaziyye minvâl-i meşrûh üzere olup meblağ-ı mecmû‘-ı mezkûr üç bin dört yüz bir guruş zimmetinde müdde‘iyye-i mezbûre Şerife Rukiye Hanım’a deyni olduğunu ikrâr ü i‘tirâf etmeğin mûcebince meblağ-ı mezkûr üç bin dört yüz guruşun müdde‘iyye-i mezbûre Şerife Rukiye Hanım’a edâ ve teslîmiyle mûmâ-ileyh Numan Bey ilzâm olunduğu tescîl ve huzûr-ı âlîlerine i‘lâm olundu. El-emru li-men-lehü’l-emr.
Fî 26 L sene 1256.
|