Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 131 Hüküm no: 133 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Cafer Bey’in kölesi Anton v. Anton’a Anton v. Kaloriz, Casimo v. Pertonime ve Ancelo v. Martomi’nin kefil oldukları Mahmiye-i Galata muzâfâtından kasaba-i Kasımpaşa’da Parmakkapı’da sâkin Casimo v. Pertonime ve Ancelo v. Martomi nâm zimmîler mahfil-i kazâda mahmiye-i mezbûreye tâbi‘ kasaba-i Beşiktaş mahallâtından Sinanpaşa mahallesi sâkinelerinden Âişe Hânım bt. Cafer Bey tarafından husûs-ı âti’l-beyânı kabûl ve tasdîka vekîl olup Ahmed Çelebi b. Mehmed ve el-Hâc Selim b. Abdullah nâm kimesneler şehâdetleri ile şer‘an vekâleti sâbite olan vardiyânbaşıları işbu râfi‘ü’l-kitâb el-Hâc Ali b. Ahmed nâm kimesne muvâcehesinde her biri ikrâr ve i‘tirâf edüp merkūme Âişe Hânım’ın esîrlerinden olup işbu hâzır bi’l-meclis uzun boylu açık kaşlı sarışın elâ gözlü Efrenciyyü’l-asl bin kıt‘a riyâlî guruş-ı kebîr kıymetli Anton v. Anton nâm esîr mâdâmki âl-i Osmân halledallâhu hilâfetehum hazretlerinin taht-ı hükûmetlerinde olan vilâyetlerde bilâ-hadîd yürüyüp ve eğer bilâd-ı İslâmî’de dahi bazı hisâr altlarına varılırsa yine bilâ-hadîd yürümek üzere evvelen her birimiz nefsine ve sâniyen firâr edüp gaybet-i münkatı‘a ile gaybet ederse kıymeti olan sâlifü’z-zikr bin kıt‘a riyâli her birimiz kendi malımızdan [40a] ale’s-seviyye edâya emr-i kabûlü hâvî kefâlet-i sahîha-i şer‘iyye ile kefîl olduk dediklerinde vekîl-i mezbûr el-Hâc Ali dahi kefâlet-i merkūmeyi kabûl ve vech-i meşrûh üzere olan kelâmlarını tasdîk etmeğin mâ-vaka‘a bi’t-taleb ketb olundu. Tahrîren fî-gurreti Cumâdelâhir li seneti’l-mezbûre. Şühûdü’l-hâl: Şuhûdü’s-sâbıkūn