Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 132 Hüküm no: 134 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Bey b. Cafer Paşa’nın Silistre’nin Karamanlı köyündeki Kanlıbıçak Çiftliği’ni Mahmud Ağa’ya sattığı Mahmiye-i Galata muzâfâtından kasaba-i Beşiktaş’da Sinanpaşa mahallesinde sâkin Cafer Bey b. el-merhûm Cafer Paşa mahfil-i kazâda işbu hâfızü’l-vesîka Hasan Alaybeyi râcil Mahmud Ağa muvâcehesinde ikrâr edüp vilâyet-i Rumeli’nde Silistre Sancağ’ında Baba Kazâsı’na tâbi‘ Karamanlı nâm karyede vâki‘ çiftlik paşa-yı müşârun ileyhe intimâyla tahdîd ve tavsîfden müstağnî tahtânî dört bâb odayı ve bir çatma anbarı ve arpalığı ve samanlığı ve koruyu ve çayırlığı ve sâirîni müştemil Kanlıbıçak demekle ma‘rûf çiftliği mezbûr Mahmud Ağa’ya yirmi beş bin nakd akçeye tarafeynden îcâb ve kabûlü hâvî bey‘-i bâtt-ı sahîh ile bey‘ ve teslîm edüp semeni olan meblağ-ı merkūmu yedinden ahz u kabz eyledim ve yine çiftlik-i mezbûrda vâki‘ arâzi-i mîriyyeden mahdûd-ı mezbûr dâhilinde aded ve mikdârı ma‘lûm tarlaları ve kışlayı cümle tevâbi‘ ve levâhıkı ile mezbûr Mahmud Ağa’ya on beş bin nakd akçeye sâhib-i arz ma‘rifetiyle tefvîz ve teslîm eyledim cem‘an kırk bin akçeyi yedinden bi’t-tamâm ahz u kabz eyledim keyfe mâ yeşâ ve yehtâr mutasarrıf olsun deyicek gıbbe’t-tasdîki’ş-şer‘î vicâhen mâ-hüve’l-vâkı‘ bi’t-taleb ketb olundu. Hurrire fî-evâili Cumâdelâhire li-sene isneteyn ve sittîn ve elf. Şühûdü’l-hâl: Gāzî Bey b. Turgud, Mahmud Ağa b. Mustafa, Seyfullah Bey b. Receb, Mustafa b. Hemver, Mehmed b. Emirhan, Ahmed Çelebi el-Cündî ve gayruhüm.