Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 100 Hüküm no: 103 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahaliye kötü davrandığı gerekçesiyle hakkında şikâyet bulunan Subaşı İbrahim’ın sorgulanmak üzere İstanbul’a gönderilmesi Kıdvetü’n-nüvvâbi’l-müteşerri‘în Kartal nâhiyesi nâibi mevlânâ -zîde ilmühû- tevkī‘-i refî‘-i hümâyûn vâsıl olıcak ma‘lûm ola ki sen ki mevlânâ-yı mûmâ-ileyh el-Hâc Mustafa -zîde ilmühû-sun Südde-i sa‘âdetime mektûb gönderip hâlâ başdefterdârım olan iftihârü’l-ümerâ ve’l-ekâbir İbrahim Sarim -dâme uluvvuhû- çukadârlarından nâhiye-i mezbûreye tâbi‘ Pendik karyesinde vâki‘ ahşab köprülerin ebniyesine ta‘yîn olunan Söğütlü Ahmed b. Abdullah meclis-i şer‘de karye-i mezbûre Subaşısı İbrahim b. Ahmed Efendi demekle ma‘rûf kimesne mahzarında toprak üzerine ta‘yîn olunan refîki Mustafa b. İsmail ile bu esnâda Pazar günü mu‘temed olduğum ameleden duvarcı tâifesinden Asiyasu ve Yorgi ve sâir duvarcı zimmîler ebniyelerin icrâ üzereler iken subaşı-yı mezbûr tamâ‘-ı hâmından nâşî bi-gayrı hakkın mezkûrları ahz ve habs ü tecrîm murâd etmekle ben dahi tahlîs murâd eylediğimde subaşı-yı mezbûr avenesiyle üzerime hücûm ve urun deyücek beni ortaya alıp sol kaşımın üstüne sopa ile darb ve cerh vücûdumu kara-bere eylediklerinden mâ‘adâ üzerimde mevcûd kırk guruş rehin bir altun sâ‘at ve beyaz kese derûnunda mahlût seksen altun ve bir çift pabuç ve bir fes zâyi‘ ve gasbeylediler deyü da‘vâ ve gıbbe’s-suâl subaşı-yı merkūm yevm-i mezbûrda ber-vech-i muharrer ma‘rekeyi ikrâr lâkin müdde‘î-i mezbûr Ahmed’i darb etmedim merkūm Ahmed bana şütûm-ı galîza ile şetmeyledi ben dahi merkūm Mustafa’ya birkaç değnek darbeyledim dediğinden mâ‘adâ ahâlî-i karye-i Pendik bi’l-muvâcehe subaşı-yı mezbûrun bi-gayrı hakkın ibâdullahı tecrîm âdet-i müstemirresi olduğunu inhâ etmeleriyle vâki‘ hâli bi’l-iltimâs arzeylediğin ecilden merkūmun keyfiyyeti ahâlîden istihbâr ve sıhhati i‘lâm tahkīkine? çavuş ma‘rifetiyle merkūm subaşı Âsitâne-i sa‘âdetime ihzâr olunmak bâbında fermân-ı âlîşânım sâdır olmuşdur buyurdum ki Dîvân-ı hümâyûnum çavuşlarından mübâşir ta‘yîn olunan kıdvetü’l-emâsil ve’l-akrân İbrahim Çavuş -zîde kadruhû- vusûl buldukda bu bâbda sâdır olan emrim üzere amel dahi subaşı-yı mezbûru çavuş-ı mûmâ-ileyh ma‘rifetiyle Der-aliyyeme ihzâr ve keyfiyyeti ahâlîden istihbâr ve sıhhati üzere i‘lâm eyleyüp mazmûn-ı emr-i şerîfimle âmil olasın şöyle bilesin alâmet-i şerîfe i‘timâd kılasın ve’s-selâm. Fî-evâili şehri Şa‘bâni’l-mu‘azzam li-sene ihdâ ve semânîn ve mi’ete ve elf.