.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 174
Hüküm no: 128
Orijinal metin no: [35a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Vefat eden Bağcı Hasan’ın Mustafa b. Mehmed’de olan alacağının varislerinden tahsil olunması

Ma‘rûz-ı dâ‘î-i Devlet-i aliyyeleridir ki,

Derûn-ı arzuhâlde ismi mezkûr medîne-i Üsküdar’da Debbâğlar mahallesinde sâkin iken bundan akdem fevt olan Bağcı Hasan b. Hüseyin b. Abdullah’ın verâseti zevce-i menkûha-i metrûkesi Fâtıma bt. Hasan nâm hatun ile sulbî kebîr oğlu Mehmed ve sulbî sagīr oğlu İbrahim Edhem ba‘de’l-inhisâr verese-i merkūmûndan sagīr-i merkūm İbrahim Edhem’in vâlidesi ve kıbel-i şer‘den vasiyy-i mansûbesi zâtı mu‘arrefe zevce-i mezbûre Fâtıma Hatun sâhib-i arzuhâl ibn-i merkūm Mehmed hâzır olduğu hâlde Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde derûn-ı arzuhâlde mezkûrü’l-ism Darbhâne-i âmire’de râyic mübâya‘ası memûrlarından es-Seyyid Mustafa Ağa b. Mehmed muvâcehesinde zevcim ve mûrisim müteveffâ-yı merkūm Hasan hayatında bin iki yüz elli beş senesi Zilka‘desi gurresinden elli altı senesi Cemâziyelûlâsı gāyetine gelince yevmiye beşer guruş ücret mukāvelesiyle yedi ay müddet mezbûr es-Seyyid Mustafa Ağa’nın medîne-i mezbûreye tâbi‘ Kādı karyesinde Kalamış nâm mahâlde kâin mâlik olduğu kürûmu mülk bağında mu‘tâd üzre kendüye hizmet edip müddet-i mezbûrede ecr-i müsemmâ-yı mezkûrundan müctemi‘ bin yüz elli beş guruş [35b] ve zevcim müteveffâ-yı merkūmun kezâlik hayatında merkūm es-Seyyid Mustafa Ağa’nın bi-şartı’r-rücû‘ emriyle bağcılık ücretinden dâyinleri gāibûn ani’l-beled Ali ve Kasım ve Hasan ve Mehmed ve Topal Hüseyin ve Mustafa ve Mehmed ve Ali nâm kimesnelere malından def‘ ü teslîm eylediği altı yüz yetmiş dört guruş ki cem‘an alacak hakkı olan bin sekiz yüz yirmi dokuz guruşun dokuz yüz on üç guruşu zevcim müteveffâ-yı merkūm hayatında mezbûr es-Seyyid Mustafa Ağa’dan ahz u kabz edip bâkīsi olan dokuz yüz on altı guruşu kable’l-ahz ve’l-istîfâ fevt ve meblağ-ı bâkī-i mezkûr benimle hâzır-ı merkūm Mehmed ve vasîsi olduğum oğlum sagīr-i merkūma mevrûs olmuş idi. El-hâletü hâzihî meblağ-ı bâkī-i mezkûr dokuz yüz onaltı guruşdan sagīr-i merkūm İbrahim Edhem’in hisse-i irsiyesine isâbet eden dört yüz guruş otuz parayı merkūm es-Seyyid Mustafa Ağa sagīr-i merkūm için bana def‘ ü teslîm eylediğinde ben dahi bi’l-vesâye yedinden ahz u kabz ve sagīr-i mezbûrun defter-i kassâmına idhâl etmemle bâkī benim hisse-i irsiyeme isâbet eden yüz on dört buçuk guruş ile oğlum hâzır-ı merkūm Mehmed’in hisse-i irsiyesine isâbet eden dört yüz guruş otuz para mutâlebesine ve bi’l-cümle husûs-ı mezkûra ve sâir cemî‘ hukūk-ı şer‘iyyeye müte‘allika âmme-i da‘vâdan ben ve oğlum hâzır-ı merkūm Mehmed’den her birerlerimiz bi’l-verâse mezbûr es-Seyyid Mustafa Ağa’nın zimmetini ibrâ-i âmm-ı sahîh-i şer‘î ile ma‘an ibrâ ve iskāt eylediğimizde mezbûr es-Seyyid Mustafa Ağa dahi mûrisimiz müteveffâ-yı merkūmun terekesinden cihet-i karzdan olarak iddi‘â eylediği iki yüz elli beş guruş mutâlebesine ve bi’l-cümle husûs-ı mezkûre ve işbu târîhe gelince sâir cemî‘ hukūk-ı şer‘iyeye müte‘allika âmme-i da‘vâdan benimle oğlum hâzır-ı mezbûr Mehmed ve vasîsi olduğum sagīr-i mezbûr İbrahim Edhem’in zimmetimizi ve tereke-i müteveffâ-yı merkūmu ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını asâleten ve vesâyeten kabûl eyledik deyü ikrâr ve tasdîkleri tescîl ve huzûr-ı âlîlerine i‘lâm olundu.

Fî 20 L sene 1256.