Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 138 Hüküm no: 146 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinanpaşa Camii vakıf odalarında sakin olan Karamanî Ayşe bt. Abdullah’ın kaldığı evin tasarruf hakkını diğer Ayşe bt. Abdullah’a devrettiği Mahmiye-i Galata’ya tâbi‘ kasaba-i Beşiktaş’da vâki‘ merhûm Sinan Paşa Câmi‘-i şerîfi’nin icâre-i mu‘accele ve müeccele ile vakf eylediği odalarda sâkine Karamanî Âişe bt. Abdullah nâm Hatun mahfil-i kazâda işbu râfi‘atü’l-kitâb Âişe Hatun bt. Abdullah muvâcehesinde bi-tav‘ihâ ikrâr ve takrîr-i kelâm edüp zikri mürûr eden odalardan icâre-i mu‘accele ve müeccele ile taht-ı icâremde olup bir tarafı merhûm Murad Ağa mülküne ve bir tarafı Yasemin Hatun mutasarrıfe olduğu vakıf odaya ve iki tarafı tarîk-i âm ve tarîk-i hâs ile mahdûd tahtânî iki odayı ve kenîfi ve muhavvatayı müştemil vakıf menzilimin hakk-ı tasarrufunu mütevellî-i vakf-ı mezbûr ma‘rifetiyle merkūme Âişe Hatun’a [43b] altı bin üç yüz fıddî râyic fi’l-vakt akçeye ferâgat ve tefvîz ve teslîm edüp ol dahi vech-i muharrer üzere tefevvüz ve kabûl ve tesellüm eyledikden sonra bedel-i tefvîz olan meblağ-ı mezkûr altı bin üç yüz akçeden iki yüz akçeyi ber-vech-i peşîn yedind[en] ahz u kabz edüp meblağ-ı bâkī altı bin yüz akçeyi târih-i kitâbdan yüz yirmi gün tamâmına dek edâ etmek üzere müeccel ve mev‘ûddur deyicek mukırre-i merkūmenin cârî ve sâdır olan kelâmını el-mukarru leha’l-merkūme bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-ışrîn min-Cumâdelâhire li-sene isneyn ve sittîn ve elf. Şühûdü’l-hâl: Osman Efendi b. Hüseyin, Hüseyin Çelebi b. Osman, Mustafa Beşe b. Abdurrahman, Ali Beşe b. Mustafa, Ali Bey b. Mustafa, Mustafa Beşe b. Mehmed, Mehmed Çelebi b. Mahmud, Mehmed b. Ramazan Muhzır