Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 138 Hüküm no: 147 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman b. Ahmed’in İbrahim b. Halil ile Ali b. Ahmed’in gemilerinden bazı eşyaları aldığını Abdurrahman b. Ahmed’in kabul ettiği Sefîne reislerinden İbrahim b. Halil ve Ali b. Ahmed nâm kimesneler mahfil-i kazâda Abdurrahman b. Ahmed nâm kimesne muvâcehesinde her biri üzerine da‘vâ ve takrîr-i kelâm edüp bundan akdem mezbûr Abdurrahman sefînelerimizden bir kürde ta‘bîr olunur kılıç ve bir peştamal ve bir yapınca ve bir sîm bıçak ve bir şalvar ve bir sahan ve bir yağmurluk ve iki Yanbolu kebesi ve bir ayak dimisi ve bir cellâbî dimi hufyeten alıp gaybet etmiş idi suâl olunup takrîri tahrîr ve eşyâ-yı mezkûre alıverilmesi matlûbumuzdur dediklerinde gıbbe’s-suâl mezbûr Abdurrahman cevâbında fi’l-hakīka mezbûr İbrahim’in sefînesinden iddi‘â eylediği bir kılıç ve bir peştamal ve bir yapıncasın alıp ve merkūm Ali’nin sefînesinden dahi bir sîm bıçak ve bir şalvar ve bir sahan almışımdır deyü ikrâr mâ‘adâyı inkâr eyledikde mezbûr Ali’den eşyâ-yı bâkīyi dahi mezbûr Abdurrahman aldığına beyyine taleb olundukda ityân-ı beyyine için istimhâl edincek mehl-i şer‘î ile imhâl olunup mâ-vaka‘a bi’t-taleb ketb olundu. Tahrîren fi’l-yevmi’s-sâdis ve’l-ışrîn min-Cumâdelâhire li-sene isneyn ve sittîn ve elf. [44a] Şühûdü’l-hâl: Yusuf Bey b. Mehmed, Ali Bey b. Mustafa, Mustafa Beşe b. Mehmed, Ali b. Turgud, Hasan Bey b. Ali, Ali Beşe b. Abdullah, Hüseyin Beşe b. Hamza, Mustafa Beşe b. Pîr Ahmed, Murad b. Abdurrahman, Abdi b. Ali.