|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 175 Hüküm no: 129 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Margarita bt. Bedros’a olan borcunu ödemesi hususunda Kirkor v. Markar’a tenbihte bulunulması
Ma‘rûz-ı dâ‘i-i Devlet-i aliyyeleridir ki,
Arzuhâl eden şahsı mu‘arrefe Margarita bt. Bedros nâm Nasrâniye Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde Anadolu’da Kocaeli sancağında vâki‘ Geyve kazâsına tâbi‘ Ortaköy re‘âyâsından ve peştamâl tüccârından derûn-ı arzuhâlde mastûrü’l-ism Kirkor v. Markar nâm zimmî muvâcehesinde mersûm Kirkor zimmî bin iki yüz kırk üç senesi Muharremi’l-harâmı’nın on ikinci günü malımdan ve yedimden iktirâz ve kabz ve umûruna sarfla istihlâk eylediği sekiz bin guruş deyni mukābelesinde her biri müstakıllen yedinde mülkü olup karye-i merkūmede kâin etrâf-ı erba‘ası Ohan ve Toros ve Yuvan zimmîler menzilleriyle ve tarîk-i âm ile mahdûd bir bâb menzil ile karye-i mezbûre hudûdu dâhilinde odalar nâm mahâlde kâin Hancı Anastaş ve Aci Ohannes zimmîler bahçeleri ve tarîk-i âm ile mahdûd bir kıt‘a dut bahçesi ve ma‘lûmü’l-hudûd bir mikdâr arsa-i hâliyesini vefâen bana bey‘ ve her birini mahâllinde kabza tarafından beni taslît eylediğinde ben dahi ber-minvâl-i muharrer iştirâ ve kabûl ve minvâl-i meşrûh [üzere] her birini mahâllinde kabza tarafından beni taslît eylediğinde ben dahi minvâl-i muharrer iştirâ ve kabûl ve ber-minvâl-i meşrûh her birini kabz etmiş idim. El-hâletü hâzihî meblağ-ı mezkûr sekiz bin guruşu bana edâ ve teslîm birle emlâk-ı muharrere-i mezkûreyi fekk ü tahlîsa mersûm Kirkor zimmîye tenbîh olunmak murâdımdır deyü da‘vâ etdikde ol dahi cevâbında kaziyye minvâl-i muharrer üzere olduğunu bi-tamâmihâ ikrâr ü i‘tirâf etmeğin mûcebince meblağ-ı mezkûr sekiz bin guruşu müdde‘iyye-i mersûme Margarita Nasrâniyeye edâ ve teslîm birle emlâk-ı muharrere-i mezkûreyi fekk ü tahlîsa mesfûr Kirkor zimmîye tenbîh olunduğu huzûr-ı âlîlerine i‘lâm olundu. El-emru li-men-lehü’l-emr.
Fî 29 L sene 1256.
|