Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 141 Hüküm no: 153 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Naranciye bt. Manol’ün menzilini Prepiye v. Nikola ile Yorgi v. Didini’ye sattığı Mahmiye-i Galata muzâfâtından kasaba-i Beşiktaş’a tâbi‘ Arnavud nâm karye sâkinelerinden Naranciye bt. Manol nâm Nasrâniye tarafından bey‘-i âti’l-beyânı ikrâra vekîl olup Mustafa b. Mehmed nâm kimesne ve İstirati v. Anderya nâm zimmî şehâdetleri ile şer‘an vekâleti sâbite olan zevci Nikola v. Teroni nâm zimmî mahfil-i kazâda işbu râfi‘iyyü’s-sifr Prepiye bt. Nikola nâm Nasrâniye ve Yorgi v. Didini nâm zimmî muvâcehelerinde bi’l-vekâle ikrâr ve takrîr-i kelâm edüp müvekkilem mezbûre Naranciye’nin mülk-i silkinde münselik olup karye-i mezbûrede vâki‘ bir tarafı Aslan v. Manol mülkü ve bir tarafı Krafil nâm zimmî mülkü ve bir tarafı kilisenin arsa-i hâliyesi ve bir tarafı yasakcılar sâkin olduğu oda ile mahdûd iki bâb tahtânî odayı ve nîm sofa ve eşcâr-ı müsmire ve gayr-i müsmireyi hâvî hadîkayı ve kenîfi müştemil mülk menzilini mezbûre Prepiye ile merkūm Yorgi’ye ale’l-iştirâki’s-seviyye on iki bin nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp onlar dahi iştirâ ve tesellüm ve kabz eylediklerinden sonra semeni olan meblağ-ı mârrü’z-zikr on iki bin akçeyi her birisi yedinden bi’t-tamâm ve’l-kemâl ahz u kabz eyledi ba‘de’l-yevm sâlifü’z-zikr menzil mezbûre Prepiye ile merkūm Yorgi’nin mülk-i müşterâlarıdır keyfe mâ yeşâ ve yehtâr ale’l-iştirâki’s-seviyye mutasarrıf olsun [45b] dedikde mukırr-ı mezbûr Nikola’nın bi’l-vekâle cârî ve sâdır olan ikrârını mezbûre Prepiye ve merkūm Yorgi bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ min-şehri Recebi’l-ferd li-sene isneyn ve sittîn ve elf. Şühûdü’l-hâl: Ali Bey b. Mustafa, Yusuf Bey b. Abdullah, Mustafa Beşe [b.] Mehmed, Derviş Beşe [b.] Mehmed, Mehmed Beşe [b.] Ramazan ve gayruhüm. Lanberyo v. Anderya, Aleksandre v. Dimitri, Yani v. Tarandafilo, Mihail v. Panayot, Androni v. Yani, İstirati v. Anderya, Nikola v. Kiryako, Yanaki v. Todori, Piyer v. Nikola, Nikola v. Mihal, Todori v. Dimo.