Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 142 Hüküm no: 154 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaçak olarak yakalanan Rus asıllı köleye nafaka tayini Kasaba-i Beşiktaş’da bi’l-fi‘il subaşı ve abd-i âbık olan fahrü’l-akrân Ali Bey b. Mustafa mahfil-i kazâda işbu hâzır bi’l-meclis açık kaşlı elâ gözlü ve üzerinde ak bogası zubun ve bir köhne mor çakşır ve başında köhne bostâncı takyesi olup Rusiyyü’l-asl Hasan b. Abdullah nâm emred muvâcehesinde takrîr-i kelâm ve ta‘bîr ani’l-merâm edüp mezbûr Hasan’ı kasaba-i merkūmeye tâbi‘ Arnavud nâm karye yasakcıları yedinden ahz u kabz eyledim suâl olunup rıkkına i‘tirâf ederse mevlâsı zuhûr edince kıbel-i şer‘-i şerîfden nafaka takdîr olunması matlûbumdur dedikde gıbbe’s-suâl evsâf-ı mezkûre ile mevsûf olan Hasan rıkk ve ibâkını bi-tav‘ihî ikrâr ve i‘tirâf etmeğin taraf-ı şer‘den yevmî altışar akçe nafaka takdîr olunup işbu hurûf ber-sebîl-i temessük ketb olundu. Tahrîren fi’l-yevmi’t-tâsi‘ min-şehri Recebi’l-mürecceb li-sene isneyn ve sittîn ve elf. Şühûdü’l-hâl: Derviş [b.] Mahmud, Mustafa Beşe b. Mehmed, Ali Beşe b. Abdullah, Mehmed Çelebi b. Mahmud, Mehmed b. Ramazan.