Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 143 Hüküm no: 155 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Bâli b. Ömer’in arsasını Ramazan b. Receb’e sattığı Mahmiye-i Galata’ya tâbi‘ kasaba-i Beşiktaş’da Sinanpaşa mahallesi sâkinlerinden el-Hâc Bâli b. Ömer nâm kimesne mahfil-i kazâda işbu sâhibü’l-kitâb Ramazan b. Receb nâm kimesne muvâcehesinde ikrâr ve takrîr-i kelâm edüp mahalle-i mezbûrede vâki‘ bir tarafı mezbûr Ramazan mülkü ve bir tarafı Mehmed Çelebi mülkü ve iki tarafı tarîk-i âm ile mahdûd tûlen beş buçuk zirâ‘ ve arzen bir buçuk zirâ‘ mülk arsa-i hâliyemi mersûm Ramazan’a üç yüz nakd-i râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi vech-i meşrûh üzere iştirâ ve tesellüm ve kabz eyledikden sonra semeni olan meblağ-ı mezkûr üç yüz akçeyi [46a] yedinden bi’t-tamâm ve’l-kemâl ahz u kabz eyledim ba‘de’l-yevm arsa-i mezkûre mezbûr Ramazan’ın mülk-i müşterâsıdır keyfe mâ yeşâ ve yehtâr mutasarrıf olsun dedikde mukırr-ı mezbûr el-Hâc Bâli’nin vech-i muharrer üzere cârî ve sâdır olan ikrârını el-mukarru lehü’l-merkūm Ramazan bi’l-müvâcehe tasdîk ve bi’l-müşâfehe tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sânî aşer min-şehri Recebi’l-mürecceb li-sene isneyn ve sittîn ve elf. Şühûdü’l-hâl: El-Hâc Mustafa [b.] Hüseyin, Bayram Beşe b. Veli, Hüseyin Beşe b. Fethullah, Hasan b. Hüseyin, Hüseyin [b.] Abdullah, Mustafa Muhzır.