|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 176 Hüküm no: 130 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Rukiye Hatun’un boşandığı eşi Numan’dan olan küçük oğlu için nafaka tahsisi talebi
Mahrûse-i Galata’ya muzâfe kasaba-i Beşiktaş’da Süleymâniye mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Şerife Rukiye Hanım bt. Ali Bâb-ı fetvâ-penâhîde Anadolu Kazaskeri Efendi hazretlerine mahsûs dâirede akdolunan meclis-i şer‘-i enverde zevc-i sâbıkı medîne-i Üsküdar’da Bülbülderesi’nde sâkin hademe-i hâssadan muhrec Numan b. Mehmed Nazif mahzarında takrîr-i kelâm ve ta‘bîr ani’l-merâm edip mûmâ-ileyh Numan Bey ile mukaddemâ zevciyyet beynimizde kāime iken mûmâ-ileyhin firâşından hâsıl ve benden mütevellid ve bi-hakkı’l-hıdâne hâlâ hacr ve terbiyemde olan sulbî oğlu es-Seyyid Mehmed Nazif nâm sagīrin malı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafakası için zevcim mûmâ-ileyh Numan Bey üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb bi-tevfîkihi’r-refî‘i’l-müstetâb tûbâ lehû ve hüsnü-meâb efendi hazretleri dahi sagīr-i mezbûrun nafakası için pederi mûmâ-ileyh Numan Bey üzerine işbu târîh-i vesîkadan bi’t-terâzî beher şehr altmış guruş farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer pederi mûmâ-ileyh Numan Bey üzerine rücû‘a vâlidesi ve hâdinesi merkūme şerîfe Rukiye Hanım’a izin vermeleriyle mâ-vaka‘a bi’t-taleb ketb olundu.
Fi’l-yevmi’s-sâdis ve’l-ışrîn min-Şevvâli’l-mükerrem li-sene sitte ve hamsîn ve mi’eteyn ve elf.
Şuhûdü’l-hâl: Muhzır Mustafa Ağa b. ( ), Muhzır Salih Ağa b. ( ), Dîvân-ı âlî çavuşlarından Ayasofyalı Osman Çavuş ve gayruhum.
|