Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 147 Hüküm no: 162 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Pavlo’nun komşuları Manol v. Todori ve Zenbolye bt. Tola ile ortak kullandıkları kapıyı kullanmasına mani olmamaları Husûs-ı âti’z-zikrin mahallinde tahrîri iltimâs olunmağın bu fakīr zeyl-i kitâbda mastûrü’l-esâmî olan cemâ‘at-ı Müslimîn ile mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karyede vâki‘ işbu râfi‘ü’s-sifr Dimitri v. Pavlo nâm zimmînin menziline varup akd-i meclis-i şer‘-i şerîf olundukda mezbûr Dimitri meclis-i mezbûrda câr-ı mülâsıkı olan Manol v. Todori ve Zenbolye bt. Tola nâm Nasrâniye tarafından nehc-i mu‘teber-i şer‘î üzere vekîl olan Ostoros v. ( ) nâm zimmîler muvâcehelerinde üzerlerine da‘vâ ve takrîr-i kelâm edüp hâlâ sâkin olduğum menzil bundan akdem İstati v. Yorgi nâm zimmînin mülkü olup hâlik oldukda vâris-i ma‘rûfu olmayıp muhallefâtı beytülmâla âid olmağile emîn-i beytülmâl olan Mehmed Ağa nâm kimesneden zikr olunan menzilin kapısı Manol ve Zenbolye ile müşterek olmak üzere iştirâ edüp ve bu âna gelince zikr olunan kapıyı iştirâken mutasarrıflar iken hâlâ mezbûrân Manol ve Ostoros bî-vech-i şer‘î mu‘âraza edüp mâni‘ olurlar suâl olunup takrîrleri tahrîr ve zikr olunan kapıyı kemâ-kân iştirâken mutasarrıf olup tasarrufuma kimesne mâni‘ olmamaği’çün [48a] yedime hüccet-i şer‘iyye verilmesi matlûbumdur dedikde gıbbe’s-suâl mezbûrân cevâblarında fi’l-hakīka merkūm Dimitri zikr olunan kapıyı bu âna gelince bizimle iştirâken mutasarrıf [tasarruf] edüp lâkin fuzûlî tasarruf edüp alâkası yokdur dediklerinde mezbûr Dimitri’den takrîrine mutâbık ve min-külli’l-vücûh kabûle lâyık beyyine taleb olundukda karye-i mezbûre sâkinlerinden Mustafa Bey b. Abdülmennan ve Muslu Beşe b. Mehmed ve Ali Beşe b. Ferhad ve Ömer Bey b. Hüseyin nâm kimesneler ve Velisari v. Pavlo ve Mihail v. Yorgi ve Zaharya v. Yorgi nâm zimmîler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müdde‘î-i mezbûr Dimitri’nin sâkin olduğu menzilin kapısı mezbûrân Manol ve Zenbolye ile kadîmden iştirâk üzere mutasarrıflardır biz bu husûsa minvâl-i meşrûh üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mezbûrân mu‘ârazadan men‘ olunup zikr olunan kapıyı iştirâk üzere mutasarrıf olup işbu hurûf ber-sebîl-i temessük ketb olunup yedine def‘ olundu ki vakt-i hâcetde müzekkir-i mâ-cerâ ola. Tahrîren fi’l-yevmi’s-sâlis ve’l-ışrîn min-şehri Recebi’l-ferd li-sene isneteyn ve sittîn ve elf. Şühûdü’l-hâl: Mustafa Efendi el-İmâm, Ahmed Çelebi b. Mehmed, Süleyman Bey Hammâmî, Mustafa Beşe b. Mehmed, Mustafa Çelebi b. Cafer, Mehmed Beşe b. Ramazan, Mehmed Beşe b. Ramazan, Yusuf Bey Muhtesib, Ali Bey Subaşı.