Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 148 Hüküm no: 163 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Bakkal Bayram b. Mardiroz’un kendisinde alacağı olduğunu iddia eden Mehmed b. Abdullah’a borcu olmadığını tescil ettirdiği Mahmiye-i Galata’ya tâbi‘ kasaba-i Beşiktaş’da bakkal tâifesinden işbu râfi‘ü’s-sifr Bayram v. Mardiroz nâm Ermeni mahfil-i kazâda Giresunlu Mehmed b. Abdullah nâm kimesne muvâcehesinde takrîr-i kelâm ve ta‘bîr ani’l-merâm edüp bundan akdem mezbûr Mehmed beni meclis-i şer‘a ihzâr edüp târih-i kitâbdan dört sene mukaddem iki yüz keyl tuz bey‘ edüp ve her keyli yirmişer akçe hesâbı üzere dört bin akçe hakkım vardır deyü bî-vech-i şer‘î da‘vâ edüp ikāmet-i beyyine için taraf-ı şer‘den üç gün mehl verilmiş idi hâlâ mehl-i mezkûr gününden bu âna gelince kırk gündür ki gaybet eyleyüp gelmemişdir suâl olunup takrîri tahrîr olunması matlûbumdur dedikde gıbbe’s-suâl mezbûr Mehmed cevâbında bundan akdem Safer nâm kimesneye iki yüz keyl tuz bey‘ edüp semeni olan dört bin akçe hakkım zimmetinde olup mezbûr Bayram nâm Ermeni merkūm Sefer’e müşâbeheti olmağile [48b] meblağ-ı mezkûru ol takrîb ile da‘vâ ve taleb eylemiş idim lâkin mezbûr Bayram ile husûs-ı mezbûra müte‘allik da‘vâ ve nizâ‘ım yokdur dedikde gıbbe’t-taleb işbu hurûf ber-sebîl-i temessük ketb olundu. Tahrîren fi’l-yevmi’s-sâlis ışrîn min-şehri Recebi’l-mürecceb li-sene isneteyn ve sittîn ve elf. Şühûdü’l-hâl: Mehmed Çelebi b. Ebûbekir, Mehmed Beşe b. Safer, el-Hâc Hasan b. Ali, Yusuf Beşe b. Abdullah, Yahya Çelebi b. Nasûh, Hüseyin Çelebi b. Muharrem, Ahmed Beşe b. Mehmed, Abdi Beşe [b.] Ali, Mustafa Beşe [b.] Mehmed, Mehmed b. Ramazan, Cafer Muhzır.