Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 148 Hüküm no: 164 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Apostol v. Hristo’nun menzilini Veli Usta b. Hüseyin’e sattığı Mahmiye-i Galata muzâfâtından kasaba-i Beşiktaş’a tâbi‘ Orta nâm karye sâkinlerinden Papa Apostol v. Hristo nâm zimmî mahfil-i kazâda işbu sâhibü’l-kitâb fahrü’l-akrân Veli Usta b. Hüseyin mahzarında bi-tav‘ihî ikrâr ve takrîr-i kelâm edüp karye-i mezbûrede vâki‘ a‘lemü’l-ulemâ’i’l-kirâm efdalü’l-fudalâi’l-fihâm sâbıkā Rumeli kazaskeri olan izzetlü Mahmud Efendi hazretlerinin taht-ı tasarrufunda olan bahçesi arsasında olup beher sene ( ) akçe mukāta‘ası ile tasarrufumda olan arsa üzerinde vâki‘ bir bâb tahtânî odayı ve havluyu ve bir bi’r-i mâyı ve kenîfi müştemil mülk menzilimin bir tarafı İlce? Yahudi mülkü ve bir tarafı Minahim Yahudi mülkü ve bir tarafı Manol nâm zimmî mülkü ve bir tarafı tarîk-i âm ile mahdûd menzilimi zikr olunan ( ) akçe mukāta‘ası ile yüz kırk kıt‘a tâmmü’l-vezn ve kâmilü’l-ayâr riyâlî guruş-ı kebîre müşârun ileyh Veli Usta’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi vech-i mübeyyen üzere iştirâ ve tesellüm eyledikden sonra semen-i mezkûr yüz kırk kıt‘a guruşu yedinden bi’t-tamâm ve’l-kemâl ahz u kabz eyledim ba‘de’l-yevm müşârun ileyh Veli Usta menzil-i mezkûrun beher sene mukāta‘âtını edâ eyleye âhardan tasarrufuna kimesne mâni‘ olmayıp keyfe mâ yeşâ ve yehtâr emsâli tasarrufu gibi mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’r-râbi‘ min-şehri Recebi’l-ferd li-sene isneyn ve sittîn ve elf. Şühûdü’l-hâl: Mahmud Efendi el-İmâm, Musa Halîfe Müezzin, Arslan Beşe b. Hasan, Mustafa Çelebi el-Hammâmî, Receb Beşe b. Hasan, Ahmed Beşe b. el-mezbûr, Ali Bey b. Mustafa, Hüseyin Beşe b. Musa, İbrahim Beşe b. Hamza, Mustafa Beşe b. Mehmed, Mehmed Beşe b. Ramazan, Ali Beşe b. Abdi.