|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 177 Hüküm no: 131 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Rukiye Hanım’ın hamileliği dolayısıyla, boşandığı eşi Numan’dan nafaka talebi
Mahrûse-i Galata’ya muzâfe kasaba-i Beşiktaş’da Süleymaniye mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Şerife Rukiye Hanım bt. Ali Bâb-ı hazret-i fetvâ-penâhîde Anadolu Kazaskeri Efendi hazretlerine mahsûs dâirede akd olunan meclis-i şer‘-i enverde zevc-i sâbıkı medîne-i Üsküdar’da Bülbülderesi’nde sâkin hademe-i hâssadan muhrec Numan Bey b. Mehmed Nazif mahzarında takrîr-i kelâm ve ta‘bîr ani’l-merâm edip mûmâ-ileyh Numan Bey ile mukaddemâ zevciyyet beynimizde kāime iken mûmâ-ileyhin firâşından hâsıl batnımda mütebeyyin hamlim olmağla vaz‘-ı haml ile iddetim münkaziye oluncaya değin nafakam için zevcim mûmâ-ileyh Numan Bey üzerine kıbel-i şer‘den kadr-ı ma‘rûf meblağ farz ve takdîr olunması matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ cenâb -vaffakallâhu te‘âlâ bi’s-sıdk ve’s-savâb tûbâ lehû ve hüsnü-meâb- efendi hazretleri dahi merkūme Şerîfe Rukiye Hanım’ın vaz‘-ı haml ile iddeti münkaziye oluncaya değin nafakası için zevci mûmâ-ileyh üzerine işbu târîh-i vesîkadan bi’t-terâzî beher şehr altmış guruş farz ve takdîr buyurup meblağ-ı mefrûz-ı mezkûru merkūme Şerife Rukiye Hanım kendi nafaka ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer zevci üzerine rücû‘a mezbûre Şerife Rukiye Hanım’a izin vermeleriyle mâ-vaka‘a bi’t-taleb ketb olundu.
Fî 26 L sene [12]56.
Şuhûdü’l-hâl: Şâhidûn es-sâbıkūn.
|