Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 153 Hüküm no: 170 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Abdülaziz’in Seyyid Mehmed Çelebi b. Ahmed’e 1.530 akçe borcu olmadığına yemin ettiği Mahmiye-i Galata’ya tâbi‘ kasaba-i Beşiktaş mahallâtından Maçuka mahallesi sâkinlerinden es-Seyyid Mehmed Çelebi b. Ahmed nâm kimesne mahfil-i kazâda işbu râfi‘ü’l-kitâb Ali Çelebi b. Abdülaziz nâm kimesne mahzarında üzerine da‘vâ ve takrîr-i kelâm edüp mezbûr Ali Çelebi zimmetinde karz-ı şer‘îden bin yedi yüz akçe hakkım olup meblağ-ı mezkûrdan yüz yetmiş akçesini alıp kabz edüp bâkī bin beş yüz otuz akçe hakkımı hâlâ taleb eylediğimde vermede te‘allül eder suâl olunup alıverilmesi matlûbumdur dedikde gıbbe’s-suâl merkūm Ali Çelebi cevâbında müdde‘î-i merkūma teslîm eylediğim yüz yetmiş akçeden gayrı bir akçe ve bir habbe deynim yokdur deyü ziyâdeyi inkâr eyledikde müdde‘î-i mezbûrdan da‘vâsına mutâbık beyyine taleb olundukda ityân-ı beyyineden izhâr-ı acz edüp istihlâf etmeğin müdde‘î-i mezbûra meblağ-ı bâkī bin beş yüz otuz akçe deyni olmadığına yemîn teklîf olundukda ol dahi alâ-vefkı’l-mes’ûl yemîn billâhi’l-aliyyi’l-azîm eylemeğin mu‘ârazadan men‘ birle mâ-vaka‘a bi’t-taleb ketb olundu. Tahrîren fi’l-yevmi’s-sâlis min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Hüseyin Çelebi b. Mustafa, Ali Çelebi b. Mehmed, Mustafa b. Keyvan, Mehmed Çelebi b. Ahmed, Ahmed Beşe b. Mehmed, Hâmid Efendi el-imâm, Enver Halîfe b. Salih, Ahmed Beşe b. Mehmed, Ahmed Çelebi b. Mehmed ve gayruhüm.