Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 154 Hüküm no: 171 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenbolye bt. Tolo’nun arsasını gaspedip üzerine bina yapan Dimitri v. Pavlo’nun men‘i Husûs-ı âti’l-beyânı mahallinde ketb ve istimâ‘ı iltimâs olunmağın bu fakīr hâssa mi‘mârlarından Üstâd Ahmed b. Abdülmennan ve Üstâd Mustafa b. Abdullah nâm kimesneler ve zeyl-i kitâbda muharreru’l-esâmî Müslimîn ile mahmiye-i Galata muzâfâtından kasaba-i Beşiktaş’a tâbi‘ Kuruçeşme nâm karyede sâkine Zenbolye bt. Tolo nâm Nasrâniyyenin menziline varılup akd-i meclis-i şer‘-i şerîf olundukda işbu râfi‘atü’l-vesîka mezbûre Zenbolye tarafından husûs-ı câ’i’z-zikre vekîl olup mahzar-ı hasm-ı câhidde İstoros v. Tarandafile ve Todori v. Dimitri nâm zimmîler şehâdetleri ile şer‘an vekâleti sâbite olan Yamandi v. Todori nâm zimmî meclis-i mezbûrda müvekkile-i merkūmenin câr-ı mülâsıkı olan Dimitri v. Pavlo nâm zimmî muvâcehesinde bi’l-vekâle üzerine da‘vâ ve takrîr-i kelâm edüp müvekkilem mersûme Zenbolye’nin babası olup bundan akdem hâlik olan mezbûr Tolo karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd tûlen on iki zirâ‘ ve arzen dahi on iki zirâ‘ arsanın üzerinde vâki‘ bir bâb tahtânî odayı ve sofayı müştemil mülk menzilini bundan esbak bilâ-vâris hâlik olup metrûkâtı cânib-i beytü’l-mâle âid olan İstati nâm zimmîye on altı bin akçeye bey‘ ve kabz-ı semen eyleyüp ba‘de helâkihî mahmiye-i mezbûrede bi’l-fi‘il beytü’l-mâl emîni olan Mehmed Ağa nâm kimesne dahi menzil-i mezkûru mezbûr Dimitri’ye semen-i ma‘lûma bey‘ edüp ol dahi ber-vech-i muharrer iştirâ eyledikden sonra hâlâ mezbûr Dimitri hadden tecâvüz müvekkilem mezbûre Zenbolye’nin arz-ı hâliyesinden tûlen iki buçuk zirâ‘ ve arzen bir zirâ‘ arz-ı hâliyesini gasb ve üzerine ebniye ihdâs etmek ile mutasarrıfdır hâlâ yedinde olan mülknâme hüccetine ba‘de’n-nazar ve’l-mesâha suâl olunup mûcib-i şer‘îsi icrâ olunması matlûbumdur dedikde fi’l-vâki‘ hâlik-i merkūm İstati’nin iştirâ eylediği menzilin mülknâme hüccetine nazar olundukda min-külli’l-vücûh vekîl-i merkūmun takrîrine mutâbık olup ve merkūm Dimitri istintâk olundukda cevâbında fî-nefsi’l-emr hâlik-i mezbûr arsa-i mezbûreye zikr olunan hüccet ile mutasarrıf olup ba‘de helâkihî muhallefâtı beytü’l-mâle âid olup emîn-i merkūm dahi zikr olunan tûlen on iki zirâ‘ ve arzen dahi on iki zirâ‘ arsa-i hâliye üzerinde mebnî bir bâb odayı ve sofayı müştemil menzili semen-i ma‘lûma bana bey‘ edüp ben dahi vech-i muharrer üzere iştirâ eylediğime binâen tasarruf ederim deyü tecâvüzü münkir olmağın mi‘mârân-ı mezbûrân [51b] dahi münâza‘un-fih olan arz-ı mezkûru mesâha eylediklerinde fi’l-hakīka mersûm Dimitri müvekkile-i merkūme Zenbolye’nin arsasından tûlen iki buçuk zirâ‘ ve arzen bir zirâ‘ yerini gasb ve üzerine ebniye ihdâs eylemişdir deyü her biri ihbâr eylediklerinden sonra mûcibi ile ba‘de’t-tenbîh mâ-vaka‘a bi’t-taleb ketb olundu. Tahrîren fî-gurreti min-Şa‘bâni’l-mu‘azzam li-sene isneteyn ve sittîn ve elf. Şühûdü’l-hâl: Mustafa Efendi el-imâm, Musa Halîfe müezzin, Mehmed Beşe b. Şaban, Muslu Beşe [b.] Abdullah, Ali Çelebi [b.] Ferhad, İbrahim Beşe b. Kasım, İsmail Beşe b. Hasan, Mehmed Beşe [b.] Ramazan, Mustafa Beşe [b.] Mehmed ve gayruhüm.